Mih ka kynhun ki nonghikai University, kiba tyrwa ban thaw da ka sorkar ba shipor ha Bangladesh

Dhaka: Mynta ka sngi, ki nonghikai, ha ka lama jong ka The Bangladesh University Teachers’ Network, ki ai jingmut ban thaw noh ia ka sorkar ba shipor ha katei ka Ri, ha kaba kin don ki nonghikai, ki nongbishar, ki riewsaid ain bad sa ki riew pawkhmat jong ka Ri bad katei kan long, katba kum ka jingai jingmut jong ki riew paidbah, lem bad ki riew sain pyrthei, na ka bynta ban wan rah biang ia ka synshar paidbah kaba pura ha katei ka ri.

Katei ka jingai jingmut, ka long ba kine ki samla kiba iakhih pyrshah sorkar, kin don bynta bha ban thung ia ki nongialam jongki, ba kin don lang ha kane ka sorkar bad ba ka Sheikh Hasina, kan hiar shuki noh kum ka myntri rangbahduh bad kan aiti ha kane ka sorkar kaba shipor.
U Prof Anu Muhammad, uba dei u nonghikai barim jong ka Jahangirnagar University (JU), u ai jingmut halor katei ka jingthaw sorkar ba shipor, haba kren sha ki kotkhubor mynta ka sngi ha Sagar-Runi Auditorium ha Dhaka Reporters Unity.

Ha kane ka jingai jingmut, ka elekshon kan long hapoh hynriew bnai bad ba ka Constituent Assembly, kan dei kaba don ia ka synshar paidbah ba pura, kaba lait na ka jingsynshar donbor, kaba pyniapher jaitbynriew ka bym leh pyrshah ia ka mon ki paidbah bad ka bym iaid da ki kam thombor bad ka dei kane ka sorkar ba shipor, ka ban pynlong mardor ia ka elekshon sha katei ka ri.