Mih ka KSU, na ka jingialang; 1tarik, yn iaid beit ka jingiakhih

Pynursla:Ka Khasi Students Union (KSU) South Central Circle, ka la mih noh napdeng ka jingialang kaba la khot ka SDO Pynursla Civil Sub-Division hadien ba u General manager ka NHIDCL, u la pynpaw ia ka jingeh ban maramot mardor ia ka jingsniew tasam ka surok NH44.

Ha ka jingia lang mynta ka sngi ha Pynursla, la wan iashim bynta ki rangbah shnong, ki nongialam seng bhalang bapher bapher naduh ki seng ki kali kamai.

Haba kren hadien ba la mih jyndat, u President ka KSU South Central u bah Ennocent Khongstia, ula ong ba ka seng kala buddien la ar snem ia kane ka jingdawa ban maramot ia ka surok hynrei man ka por bad haduh mynta ka sngi ruh, ka NHIDCL ka la shu kren kumjuh shi kumjuh khlem poi shano shano ruh.
Halor kane, u la ong ba ka seng kan iaid beit shakhmat ia ka jingiakhih halor ka jingsniew surok kumba la pynbna ka ban long ha ka 1 bad 2 tarik Nailar ban wan.

“Ngi la sngew ba ka NHIDCL ka kren kajuh shi kajuh la ar snem ba ngi la phah jingthoh bad iakynduh bad kumta ngi la rai ban iaid shakhmat ia ka jingiakhih kumba la pynbna mynshwa”, la ong u bah Ennocent.