Ka jingsam bai bam sha ki khynnah skul, lane ka minority scholarship, ka la paw tyngkrein, ia ka jingbamsap, kaba jubor tam, ha India, ha kaba 53 percent, na kitei ki skul, ki dei kiba don kyrteng tang ha rngai. Ka jingtohkit, da ka Ministry of Minority Affairs, ka lap, ba ka don ka jingbamsap, kaba la jubor haduh katta katta, ha kaba ki don 830 tylli, na kitei ki skul, kiba la bam tuh, ia ka pisa kaba T.144.83 klur, ha ki san snem ba ladep. Halor kane ka mat, ka Smriti Irani, myntri ka sorkar India, ka dawa, ba ka Central Bureau of Investigation (CBI), ka dei ban tohkit, halor katei ka jingjia baroh kawei.
Ka khubor, kaba la pynmih da ka India Today, ka iathuh, ba la ujor, halor katei ka jingjia, da ka Ministry of Minority Affairs, ha ka 10tarik Naitung bad katei ka jingbam tuh pisa, ka dei ha ki 100 tylli ki district bad ha 34 tylli ki jylla, ha kaba na ki 1,572 tylli ki skul, la lap ba 830 tylli ki dei kiba shu thok lane ba ki don 21 tylli ki jylla, na ki 34 tylli kiba shu thok, hadien, ba ki la ioh lum ia katei ka pisa, na ka sorkar India bad ka tnat jong ka sorkar India, ka la bthah ban pynduh noh ia ki account number jong ki 830 tylli ki skul.
Ka jingiarap, kaba la bei sha ki 1,80,000 tylli ki skul, ka dei na bynta ki khynnah skul, kiba naduh class 1 haduh ki kyrdan higher education bad katei ka dei ka jingiarap, kaba la sdang naduh ki snem 2007-2008 bad da katei ka jingleh tuh, ka pyni, ba ka bai bam, kaba ki dei ban ioh ki khynnah, ka leit noh sha kitei ki skul, kiba shu thok. Ka Central Bureau of Investigation (CBI), kan tohkit halor katei ka jingjia bad kaba lyngngoh, ka long ba kitei ki bank account, ki treikam da ki aadhar number, kiba shu thok lem bad kiwei pat ki kot ki sla, kiba la ju leh lane ki KYC.
Ym tang ba kitei ki skul, ki dei kiba shu thok, hynrei, kaba lyngngoh, ka long, ba ki iohlad ruh ban pynrung kyrteng ialade ha ka National Scholarship Portal bad ka Unified District Information System for Education (UDISE).
Na ki jingkhein, kiba la ioh, la pyni, ba ha Chhattisgarh, ki don 62 tylli ki skul, kiba don kyrteng tang ha rngai, ha Rajasthan, na 128 tylli ki skul, 99 tylli ki dei kiba don tang ka kyrteng, ha Assam, haduh 68 percent, ki dei ki skul, kiba shu thok, ha Karnataka, ki don 64 percent, ki skul kiba shu thok, ha Uttar Pradesh, ki don 44 percent kiba shu thok bad ha West Bengal, ki don 39 percent kiba shu thok.
Ha Malappuram, Kerala, kawei ka shnat Bank, ka sam bai bam sha 66,000 ngut ki samla pule bad katei ka jingioh bai bam, ka tam, na ka jingdon ki samla pule ha katei ka skul, kiba dei ban ioh ia katei ka bai bam.
Ha Anantnag, Jammu and Kashmir, kawei ka kolej, ka don 5,000 ngut ki samla pule rit paid, hynrei ka ai bai bam ia 7,000ngut ki samla pule. Ym tang katta, ka don kawei ka mobile number, ha kaba kawei ka kmie, ka don 22ngut ki khun bad kitei baroh ki dei kiba pule Class IX. Ym tang katta, ka don kawei ka skul, ka bym don hostel satia, hynrei uwei pa uwei u khynnah u ioh ia ka baibam ba ki sah hostel. Ha Assam, ka don kawei ka shnat bank, kaba don 66,000 ngut ki nongioh baibam, hynrei, haba la sdang ban tohkit, ki nongpyniaid ha katei ka madrasa, ki la byrngem ia ki nongleit tohkit. Ha Punjab, ka don ka skul, ka bym pdiang satia ia ki khynnah rit paidbah, hynrei, ka bai bam, ka ioh thik thik.
wow ka pap aiu kat kata eh ha pyrthei.
Sngew donbok ba ka Meghalaya kam shym lada ha ka list kita ki jylla ba shu thok, ha kane ka kynti. Hynrei man ki kam pynhiar kyrdan ka ioh bynta lang.. hahahahaa.