Mih ka jingpyrshah na ka pynlip ding

Nongpoh, 13 Naiwieng:
Ka jingpynlip bording ne ka Load shedding jong ka MeECL ha ka por 8 haduh 10 baje mynmiet, ha ki katno katne ki jaka ka thain Ri Bhoi District, ka la nangmih shibun ki jingpyrshah da kaba ong ba ha kitei ki kynta ki dang dei ki kynta ba ki briew ki dang bunkam, khamtam eh ia ki khynnah skul kiba dang don hapdeng ka jingpynkhreh na ka bynta ka Exam kutsnem.
Kumba dangshen la mih ka jingpyrshah na ki nongialam jong ki 8 shnong ha ki thain Nongpoh, halor katei ka jing pynlip ding,kiba la pynpaw ia kajuh ka sur pyrshah, hynrei mynta pat ka la mih ka jingpyrshah sa na ki riew rangbah na ki thain Jirang, kiba la pynpaw ia ka jingeh kaba la wanrah na ka Load Shedding bad kaba la ktah shikatdei eh ia ki khynnah skul.
Haba pynpaw ia kane ka jingpyrshah, na ka liang u Bah Comfort Doloi kum uwei na ki nonghikai skul, u la pynpaw ia ka jingsngewkhia halor ka jingpynlip bording ka MeECL naduh ka por 8 haduh 10 mynmiet ha ka thain Jirang hi baroh kawei.
“Kaba sangsot eh kadei ia ki khynnah skul, ha kaba wat ha kane ka juk shai ba mynta, hynrei mynmiet ha ka por ba ki pule kot ki hap ban pyndonkam da u mombati bad sharak na ka bynta ban pynkhreh ia ka Exam kutsnem, ha ka jingshisha ka MeECL ka la dei ban pyrkhat ha kum kitei ki kynta, kumba long lem baroh khamniar ba ki khynnah kin lah ban pule palat ia ka 10 baje mynmiet, namar ka la dei ka por ban thiah” ong u Bah Comfort Doloi.
Kumta u la kyntu ia ka sorkar bad MeECL ba kan phai khmat lem ia kane ka jingeh kaba la iakynduh da ki khynnah skul ha katei ka thain na katei ka jingpynlip bording ha kitei ki kynta, da kaba ong ba lada ki donkam ban leh ia ka pynlip ding, ki dei ban pynkynriah ha kiwei pat ki kynta ki bym don jingktah ia ka jingpule kot ki khynnah skul, u la bynrap.