Shillong, 20 Iaiong:
Ka jingweng noh jong ki nongialam BJP, ia U Gagan Jain, kum U Vice President jong katei ka seng bad kumjuh, sa ka jingshah weng jong U Bah David Kharsati, kum U General Secretery, ka la pynmih ia ka jing ia kynad, kaba jur ha kine ki sngi, ha ki nongialam ba halor jong ka BJP ha ka Jylla Meghalaya.
U Dipayan Chakravorty, General Secretery barim jong ka seng BJP, haba thoh ha ka peij jongu ha ka facebook, ula pynkynmaw ia ki jingiakhih ba ka seng BJP, ka pynlong ha Ri Bhoi, ha ki snem 2007-08 ban pyrshah ia ka rukom sam khaw reshon bad u da thoh shuh shuh “Mano ba long myntri sam bam sam dih ha kito ki por”? “Ka long ka jingjah burom kaba khraw shi katdei ba kita ki jait briew, ki iasoh bad ka seng BJP bad ki kren ia ka sorkar kaba khlem bam sap ha Meghalaya.
U Dipayan, u ong shuh shuh, ba ka long kaba artatien shibun eh, ia ka seng BJP, ba kan ioh lad ban thaw sorkar ha ka elekshon 2018 ha Meghalaya, ha kaba u ong, ba lada kim don ki briew kiba biang, kan long kaba jwat ia ka seng BJP, ban thaw sorkar ha ka Jylla.
Uwei na ki nongialam ba rangbah jong ka seng BJP, haba kynthoh, halor katei ka jingbujli nongialam, hadien ba dang shu dep jied, dang shisnem tam eiei, ula ong “Haba ki la ioh da kiwei kiba kham bha te, yn ong kumno”.
La sngewthuh ba lashai ka sngi, ha ka jingwan ki nongialam jong ka seng BJP na Delhi, kan lah ban don ka jingiakren, halor katei ka phang, ha kaba la shu bujli kyndit ia ki nongialam ka seng, kiba dang shu shimti kam dang ha ka 2tarik Kyllalyngkot 2016, ha ryngkat bad U Ma Shibun, uba shimti kum U President jong ka seng BJP ha ka Jylla, hadien, ba la weng noh ia U bah Khlur Sing Lyngdoh.
Phi don ban ong eiei?