Shillong, 27 Risaw:
Shuwa ka jingialang u Dr.P.W Khongjee kaba la long mynhynin ka sngi ha Sohra, ki nongialam ka BJP Sohra Mandal kumjuh ruh ka East Khasi Hills, ki la ong ba kin ym ia shim bynta bad kim don jingtip eiei shaphang katei ka jingialang bad ki la ong ba kam dei ka jingialang jong ka Party, hynrei ka dei ka jingialang ki riew shimet.
Hynrei kaba la pynlyngngoh ia ki nongthohkhubor pat ka long ba shuwa ba ka jingialang kan sdang la pyrta ha ka tynghung ban khot ia ki nongialam President , Secretary jong ka BJP Sohra Mandal ba kin kiew ha rynsan bad ha katei ka por la iohi ba u President barim jong ka BJP Sohra Mandal u bah P.Nongrum, Vice President bah Hamlet Malngiang ki la kiew sha rynsan. Kumba paw ha ki jingthoh na kawei pat ka liang la pyni ba u President dei u bah Pillar Nongkhlaw, hynrei uba la kiew sha rynsan um dei satia u bah Pillar Nongkhlaw. Ka la pynlyngngoh ia ki nongthohkhubor hato don ar tylli ka BJP ha Sohra Mandal,don ar tylli ki Mandal?.
Ban kham shai ia kane u nongthohkhubor u la ia kren da ka phone bad u Secretary jong ka BJP Mandal kaba don ha kawei ka liang u bah Rothel Khongsit, hynrei u la ong ba ia mynta kim pat kwah ban ong eiei halor katei ka bynta bad shen kin sa kren kaba donkam.
La ia kren ruh bad u Vice President u bah Hamlet Malngiang uba don ha kawei pat ka liang, utei u la ong ba kumba ka long mynta ka BJP ha Sohra ka long kumta hi ba ka dang iaid kaba rim shipor, wat la la dep ban pynduh pyndam noh ia ka naba ia ka Mandal kaba thymmai kim don jingtip satia mano ba thaw bad kumno la leh, “Ngim tip mano ba thaw ia kata ka Mandal thymmai,ngim ithuh, ki ia leh kumno ha ka jingshisha ia ka jong ngi ruh la pynduh pyndam, hynrei ha bym ia shai ngi hap ia shim ia ka bynta” u la ong.
Lah ban kdew ba kawei pat ka liang ka la kam ba ia ka tiket BJP na Sohra yn ioh da u bah Bantei Rumnong, hynrei haba ia kren pat bad u bah Hamlet u la ong ba ka jingwan jong ki heh BJP na Delhi ka dei ka dak ba ka tiket kan poi sha u Dr.Khongjee.
Lah ruh ban kdew hangne ba watla ki nongialam ka BJP Sohra Mandal na kawei pat ka liang ki kam ba kam dei ka jingialang Party hynrei la iohi pat ba ha ka jingialang la pynriam pynbeit pynphuh pynphieng da ka lama BJP.
Halor katei ka jingialang u bah Hamlet u la ong ba ki heh BJP na Delhi ki la bthah ia u Dr.Khongjee ban lum jingialang paidbah bad u la leh kumta bad ia ka tiket kan shong ha ki.