Mih ka jingjia ha Resubelpara, ba dawa pisa jubor na ki pulit

Shillong, 10 Lber:
Ki Sengbhalang na ri Lum Garo ba kynthup ia ka Garo Student Union (GSU), ka ADE, ka FKJGP bad ka AYWO ki la thoh shithi sha u myntri tnad pohing ka sorkar jylla ban pyntip ia ka daw ka jingjia ha ka 6 tarik u lber ha Resubelpara bad ha katei ka jingthoh ki la dawa na u myntri ka tnad pohing u bah HDR Lyngdoh ba dei ban pynkynriah kam noh ia u SP ka North Garo Hills, dei ban weng kam shisyndon ia ki pulit kiba donkti ban siat ia ki riew lui lui bad ba ia ka jinglut jingsep ban pynsumar ia kitei kiba mynsaw dei ban bei da ka sorkar, ki la dawa ruh ba dei ban thungkam ia kitei kiba mynsaw ba kin lah ban kyrshan ia ka ing ka sem jong ki. Ha katei ka shithi kitei ki 4 seng ki la pynpaw ha u myntri ka tnad pohing ba katei ka jingjia ka mih na ka daw ba ki nongniah kali ki la ngiah ki la kdang ia ka jingdawa pisa jubor ki pulit bad dei na katei ka daw ba kim patiaw shuh lada ki pulit ki pynieng ia ka kali jong ki naba ki tip lypa ba lada ieng kin shah dawa pisa bad lada kim don pisa ruh ki pulit ki knieh ia ki tiar ba ki kit hapoh kali, kynnoh ki 4 seng.
Ki la ong ba ha ka 6 tarik u Jamrak Sangma ( nongniah kali) , u Milseng T Sangma, u Tumbul A Sangma bad uwei pat ki la leit ban buh kwai sha Assam bad hadien ba la dep ki kam jong ki -ki la wan phai noh lyngba ka Kaldang. Haba ka kali kitei ki briew ka la poi hajan jingkieng Rereng ki pulit ki la siat khlem da maham eiei, ki 4 seng ki la iathuh ba kitei 3 ngut ki la mynsaw hynrei kim shym la sangeh ia ka kali bad ki la iaid beit beit da kaba thmu ban leit sha Hospital, watla ki la mynsaw ki la pynher beit ia ka kali sha Hospital bad ki pulit ruh ki la kthong ia ki shaduh Hospital.
Ki 4 seng ki la ong ba haba la poi ha hospital ki pulit ki la patan ia kitei ki ba mynsaw napoh kali bad la pynthiah ha madan ha kaba la don ruh katto katne ngut ki pulit kiba la kyrdem da ka kjat ba ki jaka ba mynsawryngkat bad ka pynap suloi bad ka byrngem siat iap syndon. Kham hadien la ong ba ki paidbah ki la wan ban pynithuh ba kitei kiba shah siat kim dei ki runar hynrei ki dei ki trai shnong.Ki la iathuh ba u Jamrak bad u Mileng u la mynsaw jur na shadem bad u shah siat na ksang kti,u Tumbul u la mynsaw jur naba u kuli u la ksam sha u dohnud jong u bad u la mynsaw ruh na ksang kti.