Mih ka jingiania hapdeng ki briew ka NPP bad kiba pyrta prah ha Jaiaw Pdeng

Shillong: Mynta ka janmiet ka jingialang ialap elekshon ka NPP ha Jaiaw Pdeng, ka la thap mih jingkulmar hadien ba ka la mih ka jingpynthut jong ki briew ban pyrta Prah katba dang iaid ka jingialang.
Katba dang kren u bah Hamletson Dohling, ka la mih ka jingpyrta Prah na ki briew na kham pajih ha katei ka jaka, bad hangne, ka la pynlong ia ki nongkyrshan ka NPP ban khie bitar ia ka jingshah pynthut bad ki la leit ban tur sha katei ka jaka, ha kaba ka la don ka jingiania hynrei la pynthanda noh da ki rangbah bad ki longkmie.

Namar kane ka daw, ia ka jingialang ruh la pynwai noh khlem pat poi ka kyrtong ka kong Ampareen Lyngdoh kaba la dei ban wan ha kane ka jingialang.

Na ka liang ka kong Sharon Lyngdoh ka para ka kong Ampareen ka la pyntip ha ka jingialang ba hap ban pynwai noh ia ka jingialang namar ba kum ka ing kim kwah ban mih kano kano ka jingbym sngewtynnad.
“Ngim kwah ban don kano kano ka jingjia ba sngewsih, na kata ka daw, ngi kyrpad ia ki nongpyniaid ka jingialang, ban pynwai noh, ngi ai khublei ia phi paidbah ban ai ka jingkyrshan ia kong Ampareen Lyngdoh iba dei I hynmen jong nga”, la ong ka Kong Sharon Lyngdoh.