Mih ka jingdawa, ban pynkylla ia ka kyrteng jong ka India, sha ka Bharat

Ka don ka jingdawa, na ki kynhun bapher, ban leit rah noh ia ka mat ha kane ka dorbar, ban sa long shen jong ka Parliament bad kata ka long, ban pynkylla kyrteng noh ia ka India sha ka Bharat. Ka jingshong dorbar jong ka Parliament, kan long naduh ka 18 haduh ka 22tarik Nailur 2023. Ka riti synshar ri, jong ka India, ka kren shai, ba ka India, ka dei Bharat”, hynrei mynta ka don ka jingdawa ban pynkylla noh sha ka Bharat.

U Mohan Bhagwat, nongialam ba heh duh jong ka Rashtriya Swayamsevak Sangh (RSS) ula pynsngew, ba u mynjur ia katei ka jingthmu ban pynkylla noh sha ka Bharat, namar ba ka dei kaba la ju tip, da katei ka kyrteng, ha ki spah snem ba ladep.

U Narendra Modi, myntri rangbahduh ka India, ula pynsngew ia kajuh ka jingmut, ha kaba ha ka jingkren jongu, ha ka sngi laitluid, ha ka 15tarik Nailar 2022, ula pynsngew ba ka jinglaitluid, ka dei ban lait noh, na kano kano kaba iadei bad ka jinglong mraw jong ka Ri.

Ha kawei pat ka jingjia, la iohi, ba ka Rashtrapati Bhawan, ha ka jingkhot sngewbha ia ki khlieh jong ka G20, sha ka jingiabam ja miet, ka ban long ha ka 9tarik Nailur 2023, ka thoh ‘President of Bharat’ ha ka jaka ban thoh ‘President of India’.