Shillong: Mynta ka janmiet, ka la don ka jingia pynibor hapdeng ki paidbah bad ki shipai jong ka 56 Gorkha Traning Center, hadien ba kine ki shipai ki la khang ia ka surok bad khang ia ki paidbah ban kin iaid ban leit sha shnong Mawshabuit.
Kumban shu pynkynmaw kum kane ka jingjia ka la jia ha u snem 2016 haba ki shipai GTC ki la pyrkhing ia ki paidbah kiba ju iaid lyngba na kane ka jaka shipai.
Ki nongshong shnong ka shnong Mawshabuit, ki iathuh ba mynta ka janmiet kumba 5 baje eiei ki shipai ki la khang kynsan ia kane ka lynti bad kane ka la wanrah ia ka jingdheng ki kali; hynrei haba ki la leit ban ia kren la kynnoh ba ki shipai ki la kren tohmet bad mih ka jingklumar.
Na ka liang jong ki bor ba dei peit ia ka District, mar sien tip ia kane ka jingjia, ki la leit mardor sha katei ka jaka ban tem ia kane ka jingiakynad hapdeng ki shipai bad ki paidbah nongshong shnong ka thain Mawshabuit .
Hadien ba na ka liang ka District Administration ki la leit ban kynduh ia ki heh shipai ban iakren halor kane ka bynta, ki shipai ki la mynjur ban plie noh ia kane ka khyrdop bad shah ia ki paidbah ba kin iaid lyngba na kane ka surok.
Na ka liang jong ka KSU ka pynrem jur ia ka jingleh donbor ki shipai ha kaba ki la khang ia ka khyrdop ban rung shapoh shnong Mawshbuit. Kane kam dei ka sien kaba nyngkong ha kaba ki shipai ki ju khang ia ka lynti ha katei ka shnong.
Katkum ki jingtip ba la iohlum, lyngba ki dkhot ka Mawshbuit Unit bad ka Nongthymmai Circle, u President ka KSU Mawshbuit Unit u la don ha Civil Hospital bad bun ruh kiwei ki paid nongshong ki la mynsaw ha ka jingshah ktah kti ha ki shipai haba ki leit ban dawa ban plie ia katei ka khyrdop.
Ka KSU ka dawa na ka sorkar ba ka la dei ban shim ia baroh ki jaka ba klun jubor na ki shipai, khnang ban ioh shong shngain bad suk ka leit ka wan u paidbah bad kumjuh ruh ban pynduna ia ka jingkhapngiah ka sor Shillong.
Balei ki nongmihkhmat jong ngi kim lah mo ban pynkut noh ïa kane ka jingkhang lynti ki shipai ïa ki nongshong shnong ka Mawshabuit na kawei ka por sha kawei pat? La dei ban don ka jingkut da kaba buh ka lynti kaba dei thik na ka bynta ki paidbah bad ym dei ban don ka thut ha ka leit ka wan.