Mih ka jing ia ktah kti hapdeng ki pulit u myntri Mizoram bad ki Assam Rifles

Aizawl:Ki shipai Assam Rifles ki la kyntait ia ka jingkynnoh ba la pyndik da u Myntri ka tnad bor ding ka Mizoram u F. Rodingliana ba ka kali jong u ka la shah pynsangeh ha ki shipai Assam Rifles ha ki rud jong ka nongbah Aizawl.

U Rodingliana ha ka sngi palei u la kynnoh ba ka kali jong u ka la shah pynsangeh ha ki shipai Assam Rifles ha rud jong ka Aizawl, katba u dang wan phai na ka thaiñ Champhai jong ka Mizoram kaba la mih ka jingïakren kaba jur bha.
U la iathuh ba ki bor pahara ki la buh ia ka jingpahara kali ha ka surok bah NH-54 hapdeng ka Aizawl bad Tuirial ha ka sngi palei (17 tarik u Risaw, 2024) bad ki la khanglad ia ka kali jong u watla u la pynshai ha ki ba u dei u myntri.

“Khyndiat meter hadien ba ngi la iaid lait ia ka jingpahara, lai ngut ki briew ki la pynsangeh ia ngi da kaba pynpaw ba la bthah ia ki ban leh kumta da u nongialam jong ki. Nga la kynthoh ba nga dei u Myntri bor ding… Hynrei ki briew kim shym la pyllait ia ngi katto katne por”, la ong u Rodingliana.
Ki shipai Assam Rifles ki la kam, ba ki la buh ïa ka jaka talasi kaba jngai kumba 4 km na ka ktem jong ki ha Zokhawsang ha ka surok Aizawl sha Seiling bad la ailad ïa ka kynhun jong u Myntri ban ïaid shai ha ka por ba ki talasi.

Ka kyrwoh khubor jong ka Assam Rifles, ka la iathuh ba katei ka kynhun ka la sangeh hi dalade ha kaba la peit bniah ia ki kali paidbah.
“Ki khubor ki weng noh ïa ki jingtip kiba kongsan shaphang u nongbud jong u myntri, uba la mih na ka kali jong u, ba law ïa ka jaket jong u, bad kren beiñ ïa ki shipai jong ka Assam Rifles kiba don ha ka kam. U la shim jubor ruh ïa ki body camera na ki shipai, katba kiwei pat ki nongbud ki la leh ïa ki kam pynthut, kynthup ïa ki jingkren bym ieit ri kum “leit phai biang sha India.” Ki video kiba la saphriang online ki pyni shai ïa ka jingbyrngem na ki nongtrei ban ot noh ïa ka bor ding jong ka Assam Rifles. Ka jingpynlip bording hadien kata kaba ktah ïa ki jaka sah jong ki shipai Assam ha kylleng ka Mizoram ka paw ba ka dei ka jingleh kaba la thmu ban khanglad ïa ka jingtreikam jong ki,” la pynpaw ka Assam Rifles.