Jowai, 16 Rymphang: Mynta ka sngi ha ka por step, ka la mih ka huri hura bad ka thma ktien hapdeng ki driver ba niah kali kamai bad ki nongtrei bad nongpyniaid ka Toll Plaza kaba don ha Ialong, ha u surok bah NH-06 na Jowai sha Khliehriat haduh ba ki Magistor bad ki heh pulit ka West Jaintia Hills ki la hap ban hiar mar mar ban tem ia kino kino ki jingmynsaw lane ki jingkulmar hapdeng ki arliang.
Haba iakren bad u President ka All Jaintia Tourist and Commercial Vehicles Association (AJTCVA) u ma Paila Lyngkot u la iathuh ba kyndit mynta ka sngi, katei ka Toll Gate ka la shim haduh 60 tyngka man ka trip ia ki kali kiba kamai na Jowai sha Ladrymbai- Khliehriat bad kiba wan ruh na katei ka thain sha Jowai.
Ha kine ki por ba ladep, ki driver ki ju siew tang 30 tyngka bad kane ka long baroh shisngi khlem da khein satia ia ka trip kaba ki leit bad ki wan, hynrei mynta ka sngi namar ba bun ki kali kamai kim pat don fastag la shu shim kabu da kaba shim haduh 60 tyngka man ba leit bad ba wan phai, la iathuh u ma Lyngkot.
Na kaliang utei u nongialam ki kali kamai u la iathuh ba na ka liang ka seng hynnin ka sngi Nyngkong ka la leit ia kynduh ia u DC ka WJH ban kyrpad ia u ban tuklar halor ka fastag bad ban ailad shwa ia ki kali kamai ba kin pynbiang ia ki jingdonkam na ka bynta ban ioh ia ka Fastag hynrei katei ka Tollgate ka la iaid shakhmat ban pyntreikam ia ka Fastag.
Na ka liang ka AJTCVA ka la kyntu ia ka sorkar ban tuklar ia kane da kaba ai por ia ki kali kamai ban siew 30 tyngka shisngi kumba ju long mynshwa tad haduh ban da pynbeit bad ka bor District kumjuh bad ka NHAI lym kumta kin hap ban shim da kawei pat ka lad ka lynti ban ialeh pyrshah ia ka jingkynnoh shim kabu jong ki nongpyniaid ia katei ka Toll Gate katba ia ki kali shimet pat ki dei ban siew tang 275 tyngka ha ka shi bnai.
Ha kajuh ka por u President ka Meghalaya State Labour Union, u Albinus Lamurong u la ong ba kane ka jingleh katei ka Tollgate kadei ka jingshim kabu ia ki trai kali bad u la pynrem jur ia ka bor District bad ia ka sorkar kaba ym shym lah ban ai ia kano kano ka rai da kaba kynnoh beit sha ka NHAI kaba ki heh jong ka ki don sha Delhi.
Halor kane, ki sengbhalang kiba kynthup ia ka FKJGP, HANM, ka WJNC, nalor kiwei kiwei ruh kila wan ban tuklar ia kane ka dor jong ka bai tollgate namar ba bun hi ki paidbah ba pyndonkam kali kim pat don satia ia u Account jong ka Fastag..
Ha ka por ba mih kane ka huri hura, ka la don ka jingsah kut kali kaba na ka daw ba ki kali kamai ki la block ia u surok bad iania bad ki nongtrei katei ka Tollgate.
Dei hadien ba la wan hiar ki magistor bad ki pulit bad hadien ba la iakren ki la pynllait noh ia u surok, hynrei la phah iaid hi ia ki kali khlem da siew satia katkum katei ka dor kaba shim mynta ka sngi.
Phi don ban ong eiei?