Shillong:Ka Dorbar Shnong Wapungskur ha East Jaintia Hills mynhynnin ka sngi ka la mih ban iakhun kum shi bynta ban pynpaw ia ka jingpyrshah halor ka jingthmu ban shan ia ka coke plan ha ka jaka ba hap hapoh kane ka shnong.
Kane ka jingiakhih ka long hadien ba ka Meghalaya State Pollution Conntrol Board (MSPCB) ka la ai ia ka jingmynjur ban seng (CoE) ha ka 7 tarik u Lber 2025 sha u Om Om Coke na ka bynta ban buh ia ka LAM COKE Manufacturing Unit ha Thlakuru, ka shnong ha Mookhep kaba long T 4.50 klur tyngka.
Ka jingtreikam ka CoE ka long haduh ka 28/2/2026 lada kim pynsangeh noh ne kim weng noh ia kane ka jingthmu, Ia ka por ba shisha dei ban pynjlan lada donkam haduh kata ka por ka karkhana kan long kaba la pynkhreh na ka bynta ka jingpynmih ia ki mar ki mata.
Ka dorbar shnong Wapungskur kaba la ialam da u Waheh shnong u Postling Dkhar ka la peit bniah ia ka jaka, ha kaba la ai ia ka CoE kat kum ka jingioh ia ka NOC ba la pynmih da ka dorbar shnong Mookhep bad la lap ba kane ka jaka ka hap hapoh ka jingpeit jong ka dorbar shnong Wapungskur.
“Nga sngew lyngngoh haduh katta katta ia kane ka jingleh bym lah ban pdiang jong u khlieh duh jong waheh shnong ka shnong Mookhep. Wat la u tip bha ba ngi don lypa u pud u sam, u la iaid shakhmat ban pynmih ia u NOC na ka bynta ban buh ia coke plant ha ka jaka jong ngi,” la ong u bah Dkhar.
“Namarkata, ngi la wan hangne mynta ka sngi ban pynpaw ia ka jingpyrshah kaba jur pyrshah ia kane ka jingleh beain da ki nongialam shnong kaba marjan. Kane ka long kaba bakla bad ngin ym lah ban pdiang” u la bynrap.
U la iathuh ba kane ka jaka ba la tyrwa ka dei ka jaka khlaw hapoh ka jingpeit jong ka dorbar shnong Wapungskur shnong bad ka don sha jngai na ka shnong Mookhep. U la ong ha ki por ba mynshuwa, ka dorbar shnong ka la kyntait ia ki katto katne ki jingkyrpad ban buh ia ki coke plant hapoh ka jingpeit jong ka, namar kine kin wanrah tang ia ka jingjaboh ka suinbneng bad ka jingpynjot ia ka mariang.
“Namarkata, ngi la rai ban wan man ka sngi sha kane ka jaka ban pynthikna ban ym shah ban don kano kano ka jingthaw coke company hapoh ka khyndew jong ngi”, la ong u bah Dkhar.
Phi don ban ong eiei?