Mih jyndat ki liang pyrshah na Ing Dorbar, bym hun ia ki Bill ka KHADC

Shillong, 3 Lber:
Ar ngut ki MDC ka HSPDP kiba don ha ka Liang Pyrshah u bah Pyniaid Sing syiem bad ka kong Teilinia Thangkhiew ki la mih jyndat na Ing dorbar ka KHADC namar ba ki pyrshah ia ka KHADC, ba kan pass ia ki ar tylli ki Bill ba la wanrah ha ing dorbar kata ka Khasi Hills Autonomous District (Constitution of Council of Traditional Dorbar) Bill 2016 bad ka Khasi Hills Autonomous District (Conservation and Promotion of Khasi Social Custom and Traditions) Bill 2016.
Lah ban kdew ba ha ka sngi sdang Dorbar ba la wanrah ia kitei ki bill kitei ki ar ngut ki MDC ka Liang Pyrshah ki la pyrshah jur naba katei ka bill kaba nyngkong ki la ong ba kan wanrah ia ka jingkulmar jingmut kumno ban pyniapher ia ki MDC na ki Khlieh Nongsynshar katba ha kaba ia dei pat bad ka bill kaba ar- ki la ong ba ka KHADC kam dei ban kyrkieh than eh ban Pass bad ka donkam ba kin ioh pule bniah shuwa naba ym shym la pynpoi ia ki ha ka por kaba biang khnang ba kin lah ban peit kiei dei kiba donkam ban pynrung naba kila ong ba dang bun ki riti ki dustur kiba ym pat shym la lah ban pynrung.
Hynrei hapdeng ka jingpyrshah ki Liang pyrshah kiba don tang ar-ngut ka Ing Dorbar ka la pass mynta ka sngi ia kitei ki Bill bad yn phah noh ia ki sha u Lat ka jylla ba un pynlong Aiñ, namar ka jingbym sngewhun ia ka jing pass ia katei ka Bill da ka jingbun paid kitei ki 2 ngut ki MDC ki la mih jyndat noh na ing dorbar.