Shillong:Ka Akhil Bhartiya Vidyarthi Parishad (ABVP) , Meghalaya ka la pynpaw ia ka jing sngewkhia kaba jur haba iadei bad ka jingmih jong ki kynrum kynram ha ki jaka kiba pynlong ia ka eksamin NEET-UG 2024, kata ha St Mary Mazzarello Girl’ Higher Secondary School, ha kaba ki nongthoh eksamin ha kane ka centre ki la pynpaw ba ki ioh ia ar jait ki jingkylli (Questions paper), kawei kaba la tip kum ka QRST bad kawei pat kum ka MNOP, kine ki jingkylli ki don ruh ia ki jingkylli kiba iapher bad kane hi ka la pynkulmar bad wan rah ia ka jing sngew artatien ia ki nong thoh eksamin ha katei ka centre.
La iathuh shuh shuh ruh ba ia ki admit card jong ki nong thoh eksamin ym shem la peit satia da kito kiba ap ia katei ka eksamin kaba dei ka kyndon ba hap ban bud manla ka snem.
Haba kylli la iathu ba ka dei ka rukom pyniaid eksamin kaba thymmai, hynrei hadien ba ki la dep ban thoh ia ka eksamin bad leit sha ki ïing ki sem, la khot biang ia ki ba kin pynphai ia ki admit card ha ki centre kaba la nang pynartatien bad kulmar.
Na ka liang ka ABVP, ka dawa ba ka National Testing Agency (NTA) ba ka dei ban pynshai haba iadei bad ka jingsam sha ki khynnah ia ar jait ki jingkylli na bynta ka juh ka eksamin.
Ka ABVP, ka la pan jingshai ruh hato kaei ka jingkylli kaba dei bad ka bym dei na kine ki artylli ki jingkylli kiba la sam sha ki khynnah.
Ki khynnah kiba wan thoh eksamin ha jowai centre ki pynpaw ba kine ki jingkylli ki iapher,ka ABVP ka kwah ba kine ki khynnah kiba shah ktah ki dei ban ioh lad biang ban thoh ia ka eksamin, khnang ba ka jingpyniaid ia ka eksamin jong ka NEET 2024 UG 2024, kan long kaba shai.
Ka ABVP ka kwah ruh ba ka NTA, ka dei ban shimkhia ban pynshai haba iadei bad kane ka mat kaba donkam bha, namar ba ki khynnah kiba shah ktah ki ap khmih lynti ia ka jingpynbeit haba iadei bad kane ka mat.
Phi don ban ong eiei?