Mih 32 ngut ki MDC ha KHADC rLah ban pynjari, da ka synshar U Lat

Shillong,12 Lber:
Ka Khasi Hills Autonomous District Council (KHADC) kaba don tang 30 ngut ki MDC, 29 kiba shah jied bad uwei uba shu sieh, mynta pat la mih pynban 32 ngut ki MDC. Katei la iohi ha ka jingthoh kaba ki ar kynhun ha district Council ka All Regional Party Alliance (ARPA) bad ka Peple Democratic Forum (PDF) ki la phah sha u Lat ka jylla ban pyni ba ki la don ka jingbun paid, ban thaw EC.
Ha ka 10 tarik mynta u bnai ka PDF, ka la pynher jingthoh sha u Lat ban pyntip ba ka la don 16 ngut ki MDC bad ka la biang pura ba kan thaw EC ha KHADC, ha kaba ka la leit rah ruh ia ka kyrteng ki 16 ngut ki dkhot jong ka kiba kynthup ia ki MDC Congress 12 ngut, ki MDC shimet u bah Process T Sawkmie, kong Grace Mary Kharpuri bad u bah James Sylliang uba long ruh u Secretary jong ka PDF bad u bah Sanbor Shullai ka NCP, bad ha katei ka jingthoh baroh 16 ngut ki la ia soi ia ka kyrteng jong ki.
Katba ha ka sngi kaba bud pat kata ha ka 11 tarik ka ARPA ruh hapoh ka jingialam u bah Metbah Lyngdoh u kyrtong CEM ka la phah jingthoh sha u Lat ba u dei ban pynlong noh ia ka elekshon jied CEM ha KHADC, namar ba ka ARPA kumba ka long mynta ka don 16 ngut ki MDC bad ka dang don ka jingbun paid ban synshar ha KHADC, hynrei ka la pynkylla noh ia u nongialam. Ka ARPA ruh ka la phah ia ka kyrteng jong ki 16 ngut ki MDC jong ka ba kynthup ia 6 ngut na HSPDP, 5 ngut na UDP, 3 ngut na KHNAM bad ar ngut ki MDC shimet ka kong Grace Mary Kharpuri bad u bah James Sylliang, MDC ka Mawhati.
Ka jingthoh kaba la poi sha u Lat ka pyni ba ki don 32 ngut ki MDC ha KHADC bad ka kyrteng jong ar ngut ki MDC shimet, u bah James bad kong Grace ka don ha baroh ar tylli ki kynhun, bad kumba long haduh mynta la ioh jingtip ba kitei ki ar-ngut kim pat shym la pyntip sha ka PDF ba ki la mih noh na katei ka kynhun.
Ki tyllong khubor ki la iathuh ba ka jingwan poi ki jingthoh na baroh ar kynhun ha ophis treikam u Lat kaba pyni ba baroh ar kynhun mar ia kam ia ka jingkhlain bor ka la pynkulmar jingmut ia ka ophis u Lat ha kaba la ong ba na ka daw ka jingiakam na baroh ar kynhun, ka la don ka jingpynkhreh na u Lat ban pynjari noh da ka synshar Administrator ha KHADC, namar kitei ki kynrum kynram.