MCCL: Ka Khana Lanot jong ka Jinglyngkrang

Banlam K Lyngdoh

Ka jingai khublei kaba khraw eh ka leit sha i Bah Prestone Tynsong, Symbud Myntri Rangbah ka Jylla Meghalaya iba la lah ban poi sha ka jingpynkut bad ai ïa ka rai halor ka karkhana pynmih dewbilat jong ka Sorkar kaba ngi khot ka Mawmluh Cherra Cements Limited. Ka jingbatai jingpang (diagnosis) ba la ai da i Bah Prestone ka long ba la bam kruiñ ïa kane ka karkhana da u khñiang jingpang (virus) uba shyrkhei, ubym lah shuh ban ïakhun pyndem da kano kano ka bor dawai.
Mynta ba la ïatip paidbah ba dei u virus-bym-don-dawai uba la bam kruiñ ïa ka MCCL, ngi hap ban kylli bad tip la udei uba la shu mih hi kumto ne don mano mano ba la shna khnang ïa u. I Bah Prestone ngi ngeit i sngewthuh ba ka jingkylli kaba hakhmat eh ka long ba kumno ka Sorkar (bad ki sorkar kiba ha shuwa) ka khlem lap ïa ki dienjat u virus naduh ba u sdang rung.
Khnang ba ngin tip bad sngewthuh khambha to ngin ïapeit bad pule katto katne shaphang ka jingsdang, ka jingïaid shaphrang, ka jinghïar bad ka jingtroiñ jong ka, bad ngin sa ïapynkut hi dei mano ne kiei kita ki virus.
Ka jingïoh jinglaitluid jong ka ri India na ki Phareng ha ka snem 1947 ka la pynkha ruh ïa ka Pakistan. Da kane ka jingphiah ïa ka ri India, ka ri thor kaba ju ïa khaïi pateng bad ki nong Sohra (kumjuh ruh ka thaiñ Riwar) ka la kylla long noh ka East Pakistan. Ba la ïalong la ka jong ka jong ka ri, ki nong Sohra bad Riwar kim shym lah shuh ban ïa khaïi pateng bad ki khar Shilot. Kane ka jingkhang ïa ka iew ka hat bad ïa ka khaïi pateng ka la ktah shibun eh ïa ka ïoh ka kot bad ka rukom im jong ki nong Sohra. Toi, ka Riwar kaba pynmih soh ka dang lah hi ban shalan ïa u sha ki iew ha Ri Khasi-Jaïntïa, ki thor Assam bad shabar ka Jylla (Assam) ruh. Na ka bynta ki nong Sohra la dei ban lap da kano kano ka jait kam lym kumta ki briew kin hap ban phet shnong, namar, kumba ngi tip, ka Sohra kam dei ka jaka ba long ban rep ban riang.
Namarkata, ngi kynmaw burom ïa ki riew rangbah bad riew pawkhmat baroh, khamtam eh ïa u Bah Maham Singh Sawian bad u Bah A Blingstodar Diengdoh, kiba la ïaleh shitom ban pynbor ïa ka Sorkar Assam ban pynmih kano kano ka karkhana ha Sohra, ym ba ka Sorkar kan da ïohnong ne ioh myntoi, hynrei ban aikam aijam ïa ki nong Sohra bad ban kyntiew biang ïa ka ioh ka kot jong ka thaiñ. Namar ka jingbun u mawshun bad dewïong (ha kito ki por) ha Sohra bad Mawmluh, hadien ka jingjurip kaba bniah, ka Sorkar Assam ka la pynbeit ban seng noh da ka karkhana dewbilat. Ka Hima Sohra ka la ai jaka ban pynïeng ïa ka karkhana bad ïa ki jaka shong jaka sah jong ki nongtrei. Ka Shnong Mawmluh pat ka la aiwai (leased) ïa u lum ban tih mawshun bad dewïong bad ruh katto katne ka jaka ban shna jaka shong jaka sah ïa ki nongtrei. Kane ka karkhana ka la sdang ka jingdon jong ka (ha ki kot ki sla) naduh ka 20 tarik, u Jymmang, 1955, bad la khot ïa ka ka Assam Cements Limited. Ha ka 1 tarik, u Kyllalyngkot, 1961 ka la kylla long ka Undertaking jong ka Sorkar Assam. Ka la sdang ban pynmih dewbilat nyngkong eh ha ka 15 tarik, u Naiwieng 1966, bad ka bor pynmih jong ka ka long 250 MT shi sngi. Ka la aikam aijam ïa ki nongshongshnong jong jan baroh ki shnong ha ka thaiñ Sohra. Wat naduh shuwa ban sdang pynmih dewbilat, bun ki kam ki la mih kum ka jingshna ïa ka plant, ïa ki ïingshong ïingsah, ki ïing ophis, bad bun ki briew ki la ioh bylla bad ka Kompany. Namarkata, kane ka karkhana ka la kylla long ka pliang ja thymmai bad ka jingkyrkhu kaba khraw ïa ka thaiñ Sohra. Kadei ruh ka karkhana dewbilat ba nyngkong eh ha ka Shatei Lam Mihngi jong ka Ri.
Naduh ba sdang ïa ka haduh ki snem 1970 kane ka karkhana ka la kylla long ym tang u thied snam jong ka thaiñ Sohra, hynrei ruh ka mat jingsarong jong ka Jylla Assam bad (naduh ka snem 1972) jong ka Jylla Meghalaya. La pynkylla kyrteng ïa ka sha ka Mawmluh Cherra Cements Limited ha ka 7 tarik, u Jymmang, 1974, bad ka la kylla long ka Undertaking jong ka Sorkar Meghalaya. Ka dewbilat ba la shna bad pynmih lyngba kata ka wet plant process ka la ïaid iew kylleng ha North East bad wat shabar ri ruh namar ka jingbha bad jingkhlaiñ jong ka. Namarkata, ka jingpynmih mar ka la long kaba jur bad thnem bha. Ki engineer ba dang shu pass ki ïaleh ban iohkam iohjam ha kane ka karkhana. Ki briew na kylleng ka Jylla Meghalaya ki ïawad ban ioh kam (skilled bad unskilled) ha ka. Ban ioh kam ha Mawmluh Cherra Cements Limited ka dei ka burom (privilege). Ki briew ki ïakren danda ba ki kynthei, haba don mano mano ba kylli ïalang samla, ki kylli kylla shuwa la ki trei Cement ne em. Ka MCCL colony ka dap da ki nongtrei kiba wan ïalam ïa la ki lok bad ki khun ki kti. Naduh ki ophisar haduh kiba rit ki wan ïalam ïa la ka longïing. Kumta ka colony ka sawa bad thnem da ka sur ki khynnah bad ki samla khamtam ha ki por janmiet haba ki ïalehkai. Ki khynnah na ka colony ki heh ki san bad leitskul ha Mawmluh ne Sohra. Don bun napdeng jong ki kiba la wanrah nam ïa ki skul jong ki bad ïa ka thaiñ Sohra hi da kaba ki ioh position bad pass bha ha ki eksamin Matric.
Ha ki snem 1970 ter ter, ka MCCL ka don kumba 600 ngut ki nongtrei. Shuwa ban kut u snem 1985 ka la ioh sa ar tylli ki pajwa (kilns) kiba kham heh (kiba ka bor pynmih ka long 340 MT shisngi). Ha ki snem 1992-93, da ka jingïarap jong ka ACC Ltd, la nang lah shuh shuh ban pynkiew ïa ka jingpynmih dewbilat, bad lyngba kane, ka Kompany ka khlem shahram shuh ha ki snem 1994-95.

(Kawei ka jingshisha kaba ngim lah len ka long ba kumba ka long bad baroh ki undertaking jong ka Sorkar, dei ka Sorkar hi kaba la kyrshan radbah ïa ka MCCL lyngba ki snem. Ym dei ba ka Kompany ka iohnong. Ha ka jingshisha bun bun snem ka MCCL ka la duhnong. Haoid, ka jingpynmih dewbilat ka ïaid shaid shaid bad ka jingdie ne shalan ïa ka mar ruh ka thnem bha. Namar ba ka jingïadie ïathied ka jur, ka jingiphuh iphieng bad jingidap ibiang ka wan bad kane ka tap noh ba kiba bun kin tip ba ka Kompany ka duhnong. Kaei kaba pynduhnong kumne? Kadei ka jingpynlut ba bun ha kaba maromot ne thied thymmai ïa ki kor ki bor na ka por sha ka por. Hapdeng jong ki snem 1966-1986, dei tang ha ka snem 1971-72 ba ka MCCL ka la iohnong. Hynrei kumba la ong haneng, dei ka jingbym sangeh jong ka jingpynmih mar bad ka jingdawa [demand] kaba heh hapoh bad shabar ka Jylla, kaba la wanrah ïa ka jingiphuh iphieng jong ka Kompany, jong ki nongtrei, bad jong ki iew ki hat ha ka thaiñ Sohra. Sa kawei ruh, kumba la ong haneng, ka Sorkar Jylla ka dang sngewthuh ba ym shym la seng ïa kane ka karkhana ban iohnong, hynrei ban kyrshan ïa ka ba kan ïai long ka pliang bam ja jong ka thaiñ Sohra, bad ban ïaleh katba lah pat ba kan ym kylla long u hati lieh jong ka Sorkar.)

Lyngba kine ki snem ba la ong haneng la ïalam na khmat ïa ka MCCL da ki Managing Director kum u PH Trivedi, u M Das, u H Suchiang, u JM Thangkhiew, u A Didar Singh, u MF Blah, bad kiwei. Ka Karkhana ka sawa pynmih sur bad pynkha mar ha ka jingshakri ki Works Manager ne ki General Manager kum u MD Rapthap, u JF Vasifdar, u MK Choudhury, u H Pandey, u MF Blah, u CF Syiemlieh bad u CF Lyngdoh. Ïa ki department bapher la ïalam da ki ophisar kum u S Bathew, u D Bathew, u CF Syiemlieh, u HB Kurbah, u W Tariang, u WA Giri, u GS Maring, u J Darningstone Lyngdoh, u K Basaïawmoit bad kiwei. Bun na ki nongtrei kidei ki nong Mawmluh, bad na jan baroh ki shnong jong ka Hima Sohra. Bun ki engineer bad ki nongtrei ba la pyntbit (skilled workers) ki wan na kylleng wat na shabar ka Jylla.
Kumba la ong haneng, ka MCCL Colony ka la jan long kum ka pung rit Ri India. Baroh ki jaidbynriew ki ïakhleh. Ki sngi khraw jong baroh ki jait nïam ki pynphuh pynphieng ïa ka Colony da ka tem ka put. Ki jingïalehkai bad jingïakob hapdeng ki departments kiba shongshit. Ka Independence Parade ha MCCL kadei kaba baroh baroh ki nongshongshnong ki ïakwah peit. Ka siren ka kyrsiew thiah naduh 5.30 mynstep bad ka pah khatduh 10 baje mynmiet. 3 ne 4 baje man la ka sngi la riew ka jingput maham shuwa ban bthei u bakhor ba pynpait mawshun ha par, kaba pynkhynniuh ïa ki ïing ki sem ha Mawmluh. Ki menkmie ne ki hymmen para kynthei ki tip thik katno kyntien ban taïar u kwai ba ki rangbah ka ïing kin rah sha jingtrei ha la ka shift ka shift. Ki khun rit ki ïa bunkam bad muja ka leit buh jasong ha gate neng bad gate rum. Ka madan ïeng trok ha khmat jong ka sales ophis ka shu sawa lynter da ki trok kit dewbilat bad kito kiba ap miet ban thep mar mynstep bad bunkam ha ka shet ka tiew ban bam ja miet. Ki bus jong ka Kompany ki ïaid tawïar na Mawmluh sha Sohra sha Mawsmai ban leit shaw leit on ïa ki nongtrei bad ïa ki khynnah skul ha la ka por ka por. Kiba kham nang birïa ki ïathaw jingrwai bad rwai kumne:
Khie noh she baieit,
Balei phi thiah sah?
Ban leit trei Assam Cement,
Siren ka la pah.

Hynrei naduh u snem 2000 bad ki ar lai snem kiba bud baroh baroh la ïasdang ïohi ïa ka jingnoh tymmen kynsan jong ka karkhana. Ka dewbilat ka dang ïaid iew hi hynrei ka jingpynmih ka la nang duna duna. Sa ar ne lai snem hadien ki kompany dewbilat ba pher na kylleng ka Ri India ki la sdang pynïeng la ki karkhana ha Rilum Jaiñtïa ba kham ïoh pahuh u dewïong, bad ka ïew jong ka MCCL ka la shah ktah. Ha kum kane ka por ha kaba dei ban ïapyni bor bad kine ki hati heh ha madan, ka MCCL ka la shah pyndkoh pynban ha ka jingnang ïai thut ki kor ki bor bad ka jingsngap mynthi jong ki nongpynïaid ban pynbna bad ïalap (advertise) bad ban pynïaid ïew (matketize) ïa ka mar. Lada don liewprong eiei ba u virus un ioh bsut lah ban ong ba ka dei ha kum kane ka por (da ka jingleh khnang jongno re jongno ne da kaba shu jïa hi kumto).
Dei ruh ha kane ka por ba ka jingïatreilang hapdeng ki ophisar heh ka la sdang ban jah suki suki. Tang ban ioh bujli ïa iwei i tïar iba rit eh ki nongtrei ki la hap ban ap da ki taiew. Suki suki ka bor pynïaid ka la sdang pynjngai ïalade na ka kam ka jam kaba jia shisha hapoh karkhana, ban shu kaweh kti na ka ophis kaba don ha Shillong, bad shu wan jurip toktok ïa ka jinglong jingman hapoh ka karkhana.
Haba la ïohi ba ka kam ka la makna bad ba ka mar kam mih thikna shuh, bad ruh ïa ka jingkiew jong ka iew dewbilat ba la pynmih da ka dry process na kiwei kiwei ki karkhana, ka bor pynïaid da ka jingkyrshan ka Sorkar, ka la rai, ha ka snem 2005, ban pynkha sa ka dry process plant. Hangne ngi hap ban kynmaw ba kam shym don kano kano ka rai ban pynduh pyndam noh marmar ïa ka wet process plant. La sdang ïa kane ka project ha u Jymmang 2006 bad la mang ban pyndep ïa ka ha u Risaw 2007. Ka thong jong kane ka plant thymmai ka long ban pynmih 600MT ha ka shi sngi. La buh ïa u mawnongrim jong ka da u Myntri Rangbah ha kato ka por, u DD Lapang, ha ka 1 tarik, u Ïaiong, 2005.
Hynrei ha u snem 2007 ka Kompany ka la ïakynduh ki jingeh kiba nep reng. Ka plant kaba thymmai ka la shu sah lyngkrang. Ki tïar ki tar ba la pynpoi ki shu shong thad sngi bad shah slap shah lyer haduh ba kin da sarang. Ka plant rim pat ka la nang duh bor. Man la ka taiew shu don kane ne katai ka jingthut ha ki kor ki bor. Ki jinglut ha ka jingpynïaid bad ka jingmaromot bad ka bai light ki nang kynting. Ka jingpynmih mar ka la shu long kumba eit ka blang. Ha kawei pat ka liang ka dor ba la mang na ka bynta ka plant thymmai ka la nang kynting ba la kiew dor ki tiar ki tar.
Kumne ryngkat ryngkat ka jingïaid dkoh ka plant rim, la iohlad ban pyntyllun biang ïa ki jingshna ïa ka plant thymmai ha ki snem 2010-2011, haba ka Sorkar ka la kham ai pisa. Katba ka kam ka dang ïaid jalyngeh, la wan hap sa uwei pat u dïengpynkïang ïa ka plant rim. Ha u Ïaiong, 2014 ka National Green Tribunal ka la khang salonsar ïa ka jingtih dewïong. Tden sangeh ki kor ki bor jong ka wet process plant bad ki nongtrei ki la sdang sheptieng. Ki khmat baroh mynta ki peit tang lano ban dep noh ka plant thymmai, ka ban bam dewïong duna, ban sngew im pat.
Dei ha kane ka por ba la ïohi tyngkreiñ ïa ka jingtlot bad jingleh bymsalia jong ka Management bad ka jingpaw pynryngkew jong ka mismanagement ïa ka Kompany bad ïa ka karkhana. Ban kham shai ngin ïakren kawei ka mat hadien kawei pat kumne:

1. Halor ka jingong bym ïoh dewïong shuh la shu pynsangeh jynduh noh ïa ka wet process plant. Mano ba rai ïa kane bad halor kiei ki nongrim ym don ba tip. Ha ka jingshisha ka Sorkar ka la dei ban ïaleh shitom katba lah ban pynïoh dewïong ne ban ai ka hukum ban ap haduh ban da ïoh dewïong ban nang pynïaid ia ka plant rim. Namar bym ïoh kano kano ka jingai jingkyrmen ne jingïarap na ka Sorkar, ki nongtrei ba khlem ïoh tulop kim banse ban mih surok bad shong dharna. Katba nang ap dewïong bad katba dang shna ïa ka plant thymmai, ka Management ka la dei ban phah ïa ki nongtrei ban pynkhuid ne ban maramot ïa ki jingduh jingpei kiba dang lah ban leh hi. Hynrei ka la shu sngap mynthi bad pynkhreh ban die mar jot ynda sdang ka plant thymmai.
2. Haba shna ïa ka plant thymmai, (ka ba la shimpor 10 snem ha ka jaka shi snem shiteng, kata naduh 2006 haduh 2016) la aiti ïa ka kam pynbeit pynbiang ïa ki kor ki bor ha ka Promac Company. Hynrei na ka liang jong ka Management ka khlem don ka jingbud bniah bad ka jingjurip kaba paka ïa ka rukom trei jong kane ka kompany. Ha ki snem kiba kham hadien (hapdeng jong kitei ki snem) u General Manager, uba la long Chief General Manager (CGM) hadien, u la korbar bad tuklar beit na Shillong bad wan hïar iuhkjat ha karkhana tang kumba shisien shitaiew eiei. La shu shaniah pateng ïa ka kam tang ha ki katto katne ki ophisar/manager. U CGM u dei ka jingkieng hapdeng ka karkhana bad ka Management. Hynrei hapdeng jong ka saw ka sian ba ka Kompany ka la ïakynduh (ka jingsangeh treikam jong ka plant rim, bad ka jingbymïaid shaid shaid bad thikna jong ka jingpyntrei ban pynïeng ïa ka plant thymmai), u don pynban ha Shillong bad wan jngoh ïa ka karkhana tang kumba udei shift duty. Ha ka jingshisha u la dei ban don lynter ha Sohra ban jurip ne monitor ïa ka jingïaid jong ka kam bad ban pynthikna ba kan don ka jingïatreilang hapdeng baroh ki manager jong u ban sngewthuh ïa ka rukom pynïaid. Kat ïa ka plant ka ban pynmih 600 MT shisngi la shu ïalehkai katta katta haduh ba tang ka jingaiti da ka kompany kaba install ïa ki kor ki bor bad ka jingshimti da ka MCCL, ka ban da ïatip da baroh ki nongtrei, ruh ka khlem don.
3. La sdang pynmih dewbilat lyngba ka plant thymmai ha ka 26 tarik, u Nailur, 2016. Hynrei haduh mynta kam pat don shisien ruh ba ka karkhana kan ïaid beit ïaid ryntih wat tang ar taiew lynter. Kumno ki kor kiba thymmai ki thut? Lada ka mar ka la mih, ka byrni ban thep kam don. Tang lah ïaid bad sawa ki kor ki bor shi taiew jak pat ka mih ka jingkynjah kaba shibnai ba la sniew kata kata ne hangta hangta. Teng teng shi kynta ka plant ka kyrhuh bad san kynta pat ka sangeh kynsan ba la lip ka bor ding. Ha ki por ba biang ka bor ding pat ym don sa u dewïong. Ka tang shu lah ïaid iew ka mar, kin mih ki jingpynwit bad ki diengpyngkiang kiba har rukom. I kumba ka don ka bor briew ne bor ksuid ba na sha lyndet kaba ïaleh ban pynthikna ba ka dewbilat na MCCL kam dei ban mih thikna ban ioh jingshaniah ha iew ha hat. Bad kumjuh, kumba la ong haneng, hapdeng jong kiba bun ki jingthut ki kor (machinery breakdown), u CGM u korbar beit tang na Shillong bad niar eh ba un poi da ka met ha karkhana.
4. Ban pynïaid ïa ka dry process plant lyngba ka jingnang ïa ki kor komputor, ka Kompany ka khlem phah kyrpang ïano ïano ban leit pyntbit ne ioh jinghikai. Ha kaba sdang ka la shu shaniah ha u SK Pathak (Senior Chemist) ban pynïaid ïa ka Central Control Room (CCR). Hadien kata ka la thung kam (contract) da ki operator kiba tip ïa ka dry process. Hynrei ka plant ka ïaid dkoh hi. Ka Management ka la wanrah biang ïa u Master Burner barim bad ba la shongthait, u PK Sarma, ban peit ïa ka process. Une u la shu trei tang na ka jingsngewthuh lyngba ka kam rim hynrei u la lah hi ban pynïaid katto katne. U briew uba la lah bha ban pynïaid ïa ka plant u dei u TVRN Sharma. Hapoh ka jingpeit jong u ka karkhana ka la kynjoh ïa ka thong (600 MT) bad palat. Dei tang hapoh jong u ba la don ki jingïakynduh lang jong ki Departmental Heads jan man ka sngi. Hynrei ka Management kam lah ban pynbiang ïa ki jingdonkam jong u na ka bynta ka jingpynïaid ia ka plant. Ngim tip thikna la jia aiu hapdeng jong u bad ka Mangement, bad une ruh u la mih noh. Mynta u don u T Sukla kum u Process Engineer. Hangne ruh ngi shem ba i kumba ka don ka jingkhanglad ïa ki briew kiba lah ban pynkiew bad pynïaid shaphrang ïa kane ka karkhana.
5. Ka jingtlot jong ka Management ka la pynlong ïa ki ophisar/manager kiba khlieh ïa la ki department ba kin ïaïaid la ka lynti lynti. Ngi tip shai ba kam ju don ka jingïalang ne jingïakynduh jong ki khlieh department ban ïaphylliew jingmut ne ïakren halor ka jingïaidbeit jong ka plant ne ban thaw lad ban jop ïa ki jingeh ne jingthut ki kor ki bor. La shu ïatrei ha la i jong i jong i jylli bad lada don ki jingeh ba kiwei ki department ki donkam ïa kiwei pat la shu phah beit tang da ki nongtrei ban pyndep ïa ka kam. Kumno ka lah ban long ba kat ban pynïaid ïa ka plant ki ophisar ne manager jong ki department kim ïawan lang man la ka sngi ban ïakren kumno ka kam kan ïaid ha ka shi sngi shi sngi?
6. Ka jingshim sting jong ka Management bad ka Sorkar ka paw ruh ha ka jingshisha ba ym ju ïohi ne ïohsngew hangno hangno ïa ki lad pynïaid iew ïa ka mar na MCCL, lyngba ka advertisement la ha kotkhubor, ha radio ne television. Katba kiwei kiwei ki kompany dewbilat ha ka Jylla ki pynkiewskong ïa la ka mar da ki dur kiba jrong bad ïar da ki phew phut ha baroh ki lad bad ki jaka iew, ka dewbilat na MCCL, wat la ka dei kaba bha bad kham tad, ka la shu im bad ïaid dkoh tang ha ka nam ka burom jong ki snem ba la leit (sustaining on past glory). Hato ka company kam don Marketing Manger?
7. Ka jinglynkrang ka rukom pynïaid ka paw penryngkew ruh ha ka jingpeit jingi ïa ka rukom trei rukom ktah jong ki nongtrei bad ha kaba ïadei bad ka bha ka mïat jong ki:
   a. Ym ju ïohsngew shuh ba kan don ka enquiry ne ka jingtohkit bad jingpynshitom ïano ïano haba don ka jingduh jong ki kor ki bor kaba mih na ka jingleh thurmur ne haba don ka jingshahtuh ki mar ki mata napoh ka karkhana. Bunsien ngi shu ïohsngew ba don ka jingduh ki tïar ne ki kor ne ka jingshahtuh ki mar ki mata. Kita ki khubor ki shu kut kumto bad ki ba ïatrei hi kim tip ka bor pynïaid ka la leh aiu.
   b. Naduh ki snem 2010-11 ka jingai tulop ïa ki nongtrei ka la sdang thut. Bad suki suki, kumba lah ban khmihlynti, ki nongtrei ki la shah bret syndon na ka karai khluit sha ka ding. Naduh u Kyllalyngkot 2014 kim pat ïoh ïa ka bai trei overtime. Nangta ki khlem ïoh tulop naduh u Kyllalyngkot 2015 haduh u Lber 2016. Hapdeng kine ki snem ki la shu im jalia jalaid katba ka Management ka ber khaw syiar hateng hateng. Ka khubor ai jingkyrmen na ka Management ka long ba kin ap shitom haduh ban da pynïaid noh ïa ka plant thymmai. Haoid, ynda la ïaid ka plant thymmai ki la ïaioh, hynrei haduh mynta ym pat pynkhuid lut. Sa san bnai – kata naduh u Naiwïeng 2015 haduh u Lber 2016 – ka hok jong ki ka dang sdien ha suiñ. Mynta u snem 2020 ruh ki nongtrei ki khlem pat ioh tulop naduh u Rymphang. Sa shisien pat ka Management ka ber khaw syïar 15000/-, 6000/- bad 4000/-. Ka kham ka la nangrit nangrit. Ba thngan ka kpoh ki nongtrei kim banse ban pdiang, hynrei ïa ka dor nongtrei jong ki te la pynlong nongkhrong.
8. Dang shen eh shuwa jong ka Lockdown hapdeng jong ka jingbymïoh dewïong, la ïohsngew ba ka Management ka la khot kyrpang ia ki manager ban ïakren bad ba ka la ïaleh shitom ban pynïoh 2000 MT u dewïong. Ka la pan ka jingpynskhem na ki manager la kin lah ne em ban pynmih ka dewbilat kaba bha. Ki ruh ki la ai kata ka jingpynskhem. Hato ban poi sha kata ka thong bad ha kano ka rukom yn pyniaid ia ka jingtrei, la don mo ka jingïalang ne jingïamir jingmut hapdeng ki manager? La pynïaid ia ka pajwa ban thang ia u dewïong bad u clinker uba lah ban pynïaid ïew u la mih tang kumba 3000 MT. Halor jong kane ka jingkhyllem ngim ïohsngew ba ka Management kan tohkit ne pan jingkheiñ ne jingbatai. Kynsan ka wan ka Lockdown bad kane ka kam ka la shu sahkut ha u pui pui dewbilat. Shano kata ka accountability bad ka answerability? Mano ba thut, mano bym biang? U dewïong, ki kor ki bor, ne ki briew? Ngim tip.
9. Wat hapdeng jong kane ka jingpang suh bad jingdkoh jong ka Kompany kaba phylla pat ka long ba ka Sorkar kam shim jingkitkhlieh ban shim jingkylli ne tohkit ïa ka Management. Ka jingleh kmienah jong ka Sorkar ïa ka MCCL ka paw nyngkong eh ha ka jingthung Managing Director naduh ki snem 2000 ter ter. Naduh kine ki snem ym ju don full time MD. Hapdeng jong ka jingpang ka Sorkar ka buh MD da ki briew kiba la bun kam lypa bad kiba don jingkitkhlieh bad kamram shawei ruh. Namarkata, naduh ka snem 2002 ym pat don u /ka MD ki ban ai por shisha ban pyrkhat ban trei bad ban wad lad wad lynti ban law ïa ka sohsat jong ka Kompany. Ki IAS bad MCS ba nep jabieng ki khlem lah pynbha eiei ïa ka Kompany. Ki don katto katne ki MD kiba la ïaleh ban trei bha, hynrei kum kita ruh ki neh tang shisnem ne duna ïa ka shisnem. Wat hapdeng katne ruh ka Sorkar ka dang matlah hi ban pdiang ba ki IAS bad MCS kin ym lah pynpoi ïa kane ka karkhana shaei shaei. Lada ka da kwah shisha ban pynim ïa kane ka karkhana ka la dei ban thung MD da ki briew kiba don jingnang jingtip ba ïadei bad ka jingpynmih dewbilat. Namarkata, ki MD ba bunkam shawei bad bym da tip ïa ki jnit ki jnat jong ka rukom trei ki kor ki bor, ki la shu shaniah beit ha ka jingbatai ne jingpynshai jong u CGM uba shu shong bad tuklar kam na Shillong.
10. Ka jinglehsting jong ka Sorkar ka paw shai ruh ha ka jingbym shimkhia jong ka ban thung CGM thymmai haba ka term ka la kut naduh u snem 2018. Kumno keiñ haba la ïohi shynna ba ka Kompany ka la jan duh lyer bad jan khyllem hapoh ka jingialam jong u, ka Sorkar ka dang mynjur ban pynjynsur (extent) ïa ka jingshakri jong u? Ew, kaba da sngeweh shisha ban mutdur ïa kata ka jingmatlah! La pynjynsur shi pynjynsur ïa ka jingshakri jong u, bad ha kane ka kynti ba mynta ka jingpynjynsur ka la kut ha u Jymmang 2020. Ngin hap tang ban shu ïapeit sa kaei pat ka Sorkar kan leh.

Lada pyndonkam da ki kyntien ba kham tohmet, lah ban ong, da ka mynsiem ba sngewsih bad sngewkhia, ba ka MCCL ka dei ka khunrei bym don kpa ban peit, sumar bad phikir. Lada phi rung hapoh karkhana phin ïeng lyngngoh shiphang phi don haei. Ka i thik kom ka ïingjah bad teng teng kum ka jaka rngai. Kat sha ba phi phai phi ïohi tang ka jingjngum bad jingjngut suda. Phin pynkut ba hangne ym dei tang ba ki shna dewbilat. Ka dei ruh ka karkhana ba pynmih jingliprong, jingartatien, jingsyier bad jingkhanglad. Ka plant rim ka ïeng tmang bad kynjah tang ban pynkynmaw tympang ba shisien ka la ïohi ki sngi kiba khambha. Ka plant thymmai ruh kam i thymmai. Suki suki i kumba u lyoh dum na ka plant rim un tap hynroh lang ia ka ruh. Kum ka lai nili kit synrum ka kup bad shah kyllaiñ da ki sohkhruh sohkhrew, Nangno, kano ka nala, shano ka tuid, phin shem jingeh ban sngewthuh; kine ki wire ring light shipor (temporary) ki sdien bad ïaphna naei shaei phim tip. Ka la long kum ka rangieb. Ha pyrshah jong ka, ka colony ruh ka ïeng thapngab. Ki ïing ki sem ki la nang duh. U phlang u niut u pur haduh ki jingkhang jong ki ïing bym shong briew shuh. Ban iaid kjat marwei ha colony ha ki jaka badum kam long shuh kaba shngaiñ. Mangi kiba la im ja bad longbriew manbriew na kane ka pliang ja ngi pait ka dohnud ban ïohi ba ka ïeng rangli hapdeng ki synrum bad ki sohsat kiba kat kine. Ngi shu duwai bad kyrmen ban ïohi laiñ rupa hapdeng jong kane ka ïongngeiñ.
Ka jingkren mynthi u Symbud Myntri Rangbah, wat la ka la pynmong ïa ki nongtrei ha kane ka karkhana bad ïa ki nongshongshnong ha ka thaiñ Sohra, kadei nyngkong ban kyntu ïa u hi bad ïa ka Sorkar ba kan pynthymmai lut ïa kiei kiei baroh. Tang ka jingbei pisa, kumba la kular u Chief Minister, kan ym trei kam. Nalor ka pisa ka Sorkar ka dei ban pynthymmai ïa ka Management bad ïa baroh ki post kiba iadei kam pyrshah bad ka jingshna bad jingpynmih mar. Ngi artatien jur ba ha ka jingpeit ka jong kine mynta kane ka karkhana kan khie im wat la ka Sorkar kan lehbha katno katno ruh. Nalorkata, ka por ka la dei ban wanrah noh ia ka ophis ba ha khlieh (Head Office) sha syndah ka karkhana. Ka jingtuklar kam tang na suiñ kadei ban kut noh. Ka la shynna mynta ba ka jingpynksan ba ka head office kan don ka Shillong kadei kaba la shu khun ranab. Ka bor synshar bad tnat pyniaid ïew kiba don ha Shillong ki la da rem ka jingrem kaba lutksan. Lada sdang pynthymmai lut, kan long kumba ri, sumar bad pynheh pynsan ïa i khunlung. Baroh ki nongpyniaid ki dei ban don ha syndah ban peit miet peit ïong bad phikir ïoh ka ïam shiteng miet. Lym kumta kajuh hi ka apot kan wan lap.