Matlah ka JHADC ba pynkylla par maw ia ka jaka ha Shamor

Jowai, 3 Rymphang: Ka Jaintia Hills Autonomous District Council (JHADC) ka la hap ban leh matlah halor ka jingtihmaw pathar ki riew shimet ha ka jaka jong ka kaba don ha ka jaka kaba la tip kum ka Shamor, ha lynti na shnong Mynso sha shnong Samatan ha West Jaintia Hills District.
Katei ka jingtih maw pathar da ki riew shimet ha katei ka jaka ka la iaid la bun snem hynrei ka JHADC ka la leh matlah bad kane ka jingleh matlah ka JHADC ka la wanrah ruh ka jingduhnong kaba khraw ia katei ka ophis namar baroh ki riew shimet kiba donkti ban tih maw na katei ka jaka khlaw ka JHADC, kim ju siew khajna satia sha ka tnad Forest Department.
Na ka liang u Chief Forest Officer, u la pyntikna ia kane da kaba ong ba ki riew shimet kiba tih maw ha katei ka jaka kim ju pan bor ne siew khajna ruh sha ka District Council.
Ka jingtih maw pathar ha katei ka jaka ym tang baka la pynjot ia katei ka jaka khlaw ka JHADC, hynrei ka la pynsiewdur ruh ia ka wah Myntang kaba don sha trai jong katei ka par maw.
Ka jaka ka District Council kadei ka jaka jong u paidbah ka ri lum Jaintia, kaba lyngngoh pat ka JHADC kam shym la khang satia ia kitei ki riew shimet ban tihmaw na katei ka jaka khlem kano kano ka jingsiew khajna bad kam da pyrkhat satia ia ka jingkylla dew shyiap katei ka jaka.