Maramot ia ka surok ha Nonglum, ong ka CORP

Shillong, 6 Nailur:
Ka CORP Raid Maw buh Circle ka la kyntu ia ki bor ba dei peit ba kin moramot noh ia ka surok ka la sniew shaba palat ha shnong Nonglum, Umroi.
Ka seng ka la ioh ruh ia ka jingud jingnam ki paidbah ia ka jingsniew palat ka surok na shnong Umktieh Nongshiliang sha Nonglum, Umroi. U President ka Raid Mawbuh Circle, bah Augustine Nongrum ula ong ba ka jingsniew ka surok ka la buh jingeh ia ki paidbah ha katei ka thain, ba kin lah ban pyndep ia ki kam ki jam ha ka por kaba biang khamtam ki khynnah skul kiba leit ba wan man ka sngi.
Ula ong, na ka jingsniew palat ka surok, wat ka bai kali ruh la pynkiew jubor kaba la ktah shuh shuh ia ki paidbah.
U bah Nongrum ula kyntu ia ka tnad PWD bad ia ka sorkar jylla ban shimkhia ban maramot noh ia katei ka surok khnang ki paidbah kin suk ha ka leit ka wan ha katei ka thain.