Mar katjuh, kamai ki Taksi Shillong bad ki maji Balat

Shillong,18 Nailar:
Ka dor ba ki kali kamai ( Local Taxi) ki ju kamai hangne ha nongbah Shillong tam ne duna eh ka long T.500 tyngka bad katei ka dei ka dor kaba ki nongniah Taxi ki ju pynpoi sha ki malik ne ki trai kali, kaba phylla ka long ba ha ka shnong Balat ka Lieng ka lah ban kamai katjuh kumba kamai ki Local Taxi hangne ha nongbah Shil long. Kitei ki lieng ki dei kiba kamai ban kit briew na shilliang sha shilliang wah bad kumjuh ruh ban kit ia ki mar ki mata.
Haba ia kren bad u nongthohkhubor, ha kine ki khyndiat sngi ba la dep, u Bijoy Sangma na ka shnong Moilang, Balat uba dei u maji uba ju kamai ha ki thain Balat, u la iathuh ba ka lieng jong u ka ju kamai palat T.300 tyngka man ka sngi bad teng ha ka por sngi iew u kamai lai saw shah ia katei kaba u ju kamai man ka sngi.
U Bijoy u la iathuh ba u la kamai palat san snem tam ha ka wah Balat ban kit ia ki briew kiba wan na Moilang sha Balat bad na Balat sha Moilang bad ki shnong ba marjan. U iathuh ba ka Lieng jong u ka shong dor T.50 hajar tyngka bad la shna da ki diengrai bad kiwei pat ki dieng kynsai, katei ka lieng kaba u king u la iathuh ba ka kit haduh saw phew san phew ngut briew ryngkat ki tiar ki tar.
Ha kine ki khyndiat sngi ba la dep ba u nongthohkhubor u la hiar sha shnong Balat, la iohi ba ki nongkamai lieng ha katei ka wah ki am hi triang watla hapdeng ka jingshit kynthah jong ka sngi, haba ia kren bad ki katto katne ngut ki nongshong shnong katei ka shnong pat ki iathuh ba kitei ki lieng ki ju kamai da ki phew hajar ruh shisngi haba dei ka sngi iew.