Mar iapoi, leit jngoh ka Khun Syiem Thailand ia ka Law Kyntang Mawphlang

Shillong, 23 Naiwieng:
Ka Khun Syiem Thailand ka Maha Chakri Sirindhorn, ka la leit jngoh ia ka law kyntang mynta ka sngi mar ia poi ha nongbah Shillong.
Kane ka khun Syiem kaba wan jngoh ia ka jylla Meghalaya, ka la pynlut por hynne ka sngi ban rung ha law kyntang ha Mawphlang ha kaba la pdiang burom da ki longsan ka shnong lem da ka riam bad ka shad Khasi tynrai.
Ym tang ka Law kyntang ha Mawphlang, kane ka khun syiem kan leit ruh ban pynlut por lashai ka sngi ia ka Sohra kaba bna nam kum ka jaka ba jur slap tam ha ka pyrthei, nangta sha Mawlynnong, bad sha Shnongpdeng kaba don ha thain Amlarem ka West Jaintia Hills.
Ia kane ka khun syiem la pdiang burom ruh da u Myntri Rangbah u Dr Mukul Sangma ha ka jingbamja miet ha Hotel Pinewood shwa ba kan leit thiah ha Polo Orchid Resort.
Ha kane ka jingwan jngoh jongka ia ka Meghalaya, kan leit iakynduh ruh ia u vice chancellor ka NEHU ha 25 tarik shwa ba kan leit pat sha Assam.
Ia ka khun Syiem Thailand la jied ruh ban ioh pdiang ia ka “World Sanskrit Award” ha ka jingkhot sngewbha da ka Indian Council of Cultural Relations (ICCR).