Shillong:Ka jingther u slap ha kine ki ar sngi, kala mih ruh ka jingtwa ha surokbah Shillong-Dawki, kaba dei ka surok kaba ju mad bha ia ka jingtwa man ka por. Ha ka sngi u Blei, ka la don ka jingtwa hajan Lad Mawkhap, bad ha bynta ka Rngain. Kane ka la wanrah ia ka jingsahkut kali hynrei la ioh jingtip ba ki briew ba dei peit kila pynsted ban pynkhuid ia ka twa da ka puhhilum ban pyllait ia ka leit ka wan.
Ha kawei pat, ka surokbah NH06 ha Sonapur, East Jaintia Hills ka la hap hakhmat ka surok thliew ne tunnel bad kane ka la wanrah ia ka jingsahkut kali, tangba la lah ban pynlait ia ki kali na ka jingsted ka puhshilum.
Ka jinghap u slap ha kine ki ar sngi, ka la ktah jur ia kiba bun ki bynta ha ka nongbah Shillong khamtam ha thain Nongmensong, Pynthorbah, ha kaba ki surok, ki lynti kila shlei um lut bad ka um ka la poi haduh ki khrum ki ïing briew bad ki don ki kali ba ieng ha surok kiba la per ha sla um.
Ka jingthut ka leit ka wan ha surok Pynursla ka dei ha ka bynta ba khot ka Khohyiar na ka jinghap u mawbah lngun ba heh bha hajan ka Lad Mawkhap kaba jngai katto katne kilometer na Rngain.
La iathuh ba lada dei ba hap ha ka por ba bunkam ka iaid ka ieng jong ki kali, kan long kaba mynsaw hynrei ka la jia ha ka por bym don ba iaid.
Ha ka jingshisha, ka surokbah NH-40 Shillong-Pynursla-Dawki ka dei kaba mad bha ia ka jingtwa bad mynta ka jingshna ban pynheh ruh ka dang sangeh hadien ba ki kompeni ba shna kila iehnoh shiteng bad ka surok ka la kylla sniew lut namar ba ki bynta ba la tih, la shu pynsah kumto, bad la mih ki thliew ki syar.
Ki nongleit nongwan ba leit ba wan kin hap ban husiar khamtam ha kine ki por ba jur slap.
Ha ka jingshisha, u myntri ka tnad Road and Transport ka sorkar pdeng u Nitin Gadkari ha ka por ba u ialap elekshon ha Ranikor ha bnai Rymphang, u la ong ba ia ka jingshna ia ka surok Shillong-Pynursla-Dawki yn pyndep ha u Iaiong 2024 hynrei kan long kam ne em kane namar ba haduh mynta baroh ka jingpyntrei ka dang sahngeh lut.
Phi don ban ong eiei?