Shillong: U myntri ka tnad kam pohïing ka jylla uba dang shu shimti, u la khot iakren noh ia ki sengbhalang hapoh ka lama ka Confederation of Meghalaya Social Organisation (CoMSO) lashai ka sngi ha kamra treikam jongu.
Kane ka long hadien shi sngi ba ka CoMSO ka la pyntreikam da ka Inner Line Permit (ILP) lajong da kaba kyndar bad talasi ia ki poiwir kiba wan rung sha kane ka jylla.
Ka CoMSO ka la dawa ba ka sorkar India ka dei ban pyntreikam noh ia ka ILP ha kane ka jylla hynrei ka jingpynslem ka sorkar pdeng, ka la pynlong ia ki ban shim ia ka sienjam ban talasi poiwir dalade hi.
“Ngi la khot ia ka CoMSO ban iakren lashai bad ngan khot ruh ia kiwei ki sengbhalang ban tip ia ki jingeh jong ki namar ba ha kaba kut hi, la ka dei ka sorkar ne ki sengbhalang, ngi dei kijuh ki nongshong shnong ka jylla hynrei ngi don la kajong ka kam ban pyndep”, la ong u bah Lahkmen.
U la ong ba kano kano ka jingeh lah ban iakren bad iapynbeit lyngba ka jingiakren iamir jingmut lang.
Ha kawei ka liang, ka CoMSO mynta ka sngi ka la sdang ban pyntreikam ia ka ILP lajong da kaba talasi ia ki poiwir ban wan sha ka Jylla. Ia kane ka jingtalsai la leh ha kylleng ka Khasi, Jaintia bad Garo Hills. Ha kiba bun ki jaka ka kynhun ka la iatreilang bad ki tnad ka pulit lait noh tang ha ki katto katne ki jaka bym wan ki pulit.
Ha kane ka sngi, ki poiwir ki bym lah ban pynshisha ba ki dei ki Nong India, ym shym la shah ia ki ban rung sha ka jylla. Ia kito kiba don ki kot ki sla ba biang la kylli bniah ki wan leh aiu, kin sah haei bad katno sngi kin sah.
Ka CoMSO ka ai khublei ia ka tnad Directorate of Infiltration kiba la ia treilang bad ka kynhun bad khmih lyngti kan iai neh ha ki sngi ban wan ruh.
Ka kynhun kan dang bteng ban talasi ha ki sngi ban wan katba ka sorkar kmie kam pat pyntreikam ia ka ILP ha ka jylla Meghalaya hi baroh kawei.
CoMSO iaid shaphrang.