Ka Hema Malini, ka la dap 71 snem, ha ka 16tarik Risaw 2019 bad ka Hema, ka la kren shaphang ka jing ia poi kha jong ka bad U Dharmendra bad kaei ka jing pyrkhat jongka na bynta ki sngi ki ban sa wan.
Ka Hema, haba kren bad ka Deccan Chronicle, kaba dei ruh ka dkhot ba mynta jong ka Lok Sabbha na Mathura ha Uttar Pradesh, ka iathuh ba kane ka kynti ba mynta, kan dei ka kynti ba khadduh eh, ba kan mihkhmat bad ka la ong shuh shuh “Mynta nga la nang iaw ka met, katba ka nang wan kawei pat ka sngi kha. Nga kwah ban pyndep ia ki jingkular jongnga sha ki paidbah bad dei na kata ka daw, ba nga kwah ban ialeh sa mynta shisien bad hadien kata, ngan sangeh noh ia ka kam sain pyrthei bad ngan pynlut por noh ialade bad ia la ka iing. Nga donkam ia ka por, na bynta ka iing ka sem bad ka kam shad jongnga ruh” ong ka Hema, kaba la jop na Mathura ha u snem 2014 bad u snem 2019 ruh.
Halor ka jing iadei jongka bad U Dharmendra, uba dei u kurim jongka, ka Hema, ka ong “Mar ia iohi ia u, nga la hun jrut ka mynsiem, namar nga tip, ba u dei uba ieid ka kut shadem jongnga” bad ka ong shuh shuh ba halade hi ka kwah palat ban ia poi kha noh bad u, hynrei kam kwah pat ban pynthut ia ka tnga nyngkong jongu lane ia ki khun jongu ruh. “Nga ia poi kha bad u, tangba ngam ju khanglad satia ia ka jingiadei jongu bad ka iing nyngkong jongu”.
Halor ka jingbhabriew jongka, ka Hema, ka kylli “Kaei kata ka jingbhabriew?” bad ka ong shuh shuh “Ngam ju shim ialade ba nga dei kaba bhabriew, hynrei ki dei ki briew kiba ong ba nga bhabriew bad nga shait kylli ialade, la nga bhabriew shisha ne em bad nga shim ba ka jing kordor jong ka jingbhabriew, ka long ba phim dei ban pyrkhat shaphang jongka”.
Phi don ban ong eiei?