Shillong 12 Lber: U Deputy Speaker jong ka iing dorbar thawaiñ ka jylla u bah Timothy Shira, mynta ka sngi balang ka 12 Tarik u Lber 2025, u la leit ban ujor mukotduma pyrshah ia ki arngut ki youtubers ha iing kashari ki ba la pynsngewthuh bakla ia ia ki paidbah hapoh social media.
U bah Timothy Shira u la dawa ia ki arngut ki youtubers ki ba la pynthohbria ia u hapoh social media, ba kidei ban siew ka Bai mynraiñ mar 100 klur.
Kine ki arngut ki ba la pynthohbria ia u bah Timothy Shira hapoh social media ki kynthup ia kawei ka longkmie, kata ka kong Mikanchi R Sangma ka ba dei na Daranggiri, Goalpara District,Assam bad uwei pat u rangbah, u bah Balarang Marak u badei na Thapa Darenchi, North Garo Hills District.
U bah Timothy Shira haba kren sha ki lad pathai khubor mynta ka sngi hadien ba la mih na District Court u la iathuh, ba kine ki arngut ki youtubers ki la pynthohbria hapoh social media, ia ka jingkren jongu ha ka iing dorbar thawaiñ ka jylla dang ha kine ki sngi, ka ba u la kren ha kaba iadei bad ka jingpynlong ia ka Nongbah Tura Kum ka Nongbah Tlang.
Kane ka jingkren jongu hapoh iing dorbar thawaiñ ka jylla ka la pynlong ia ki paidbah jong ka thain Tura baroh kawei ban pyrshah jur ia kane.
Phi don ban ong eiei?