S.K.N
[ba bteng] U Bahnah u la dap da ka jingsngew lehrain bad sngew babe ia kaei kaba la jia. Hynrei wat katta ruh u tngen namar u iohi ia ka jingjai jai ka Kmie bad u Kpa ka Riia.
“Riia i Mei jong phi i ieid shisha ia phi. Ka donkam ba phin panmab noh na i nga ruh ngan sa leh kumta ynda la dep ma phi bad lada ki suk ngan sa wan sah wan shong noh syndon.” La pynpaw u Bahnah
“To Bahnah, ngan leh noh kumta..” La kohnguh ka Riia
Hadien ba la dep dihsha u Bahnah u ieng ban leit buh bad khlieng syndon baroh ki tiar tngit. Kum u trai iing. Ynda la dep u sa shongkai biang bad u Kpa kumjuh ka Kmie ka Riia.
Dei hangne ba Ki sa iohlad ban iakren ia ka kam kaba jia ha ka khun jong ki.
Ka kmie ka Riia ka la ai lain ia u men Kpa ban kren ia ka kam. U Bahnah u la sngewthuh ia kaei kaba jia. U Kpa u la peit sha u Bahnah bad u la isynei ia u, namar u iohi ba u la phuh syep phuh syar. Hynrei wat katta ruh um banse ban kren ia kaei kaba dei ban kren.
“Bahnah phi tip ong ba ka Riia ka wan shim dawai mynne na i Doctor bad ynda la poi hangta i Kmie i iathuh ba i Doctor i pyntip ba i Riia i la armet..” La maitphang u Kpa
Bahnah u la shu dem ngon ka khlieh sha tbian. Hangta um sngew lah shah shuh u la ong kynsan.
“Ka pop jong nga kane kaba jia Mama…”
U Kpa ka Riia u la sngewthuh ba dei na u Bahnah.
“Ngam ong eh ka pop jong phi, hynrei ka dei ban shai. Naduh nyngkong ha ka jingshisha namar phi jan phi juh bha kumto bad nga iohi ruh ba phi ia leit ia wan donburom donakor. Pynban ngi shu kyndit kein haba iohsngew ia kane ka khubor. Jen da ngi la tip naduh basdang lei, ngim don eiei ban khanglad namar nga ngeit phi dei u briew ba tip blei tip briew..” La pynpaw u Kpa ka Riia
“Hooid, Mama, ngi la bakla lang. Nga sngew kmen ba phi pdiang ia kane. Toi, nga la sngewthuh lypa hi ba kane kan jia. Tangba imat ngim pat ia rai lang ban iathuh noh ha iing ha sem, da kaba buhteng ia ka por. Hynrei mynta nga sngewthuh ba ka dei ka jingshisha ba ka por kam ap iano iano…” La pynphai ktien u Bahnah.
“Te haba kumta Bahnah phi pyrkhat kumno…?” La buh jingkylli u Kpa ka Riia
“Phi mut ban ong kumno Mama…? Pan jingshai biang u Bahnah
” Nga mut ban ong phin rai kumno ha ka jingiadei bad ka Riia…?” La ong u Kpa
“Lada phi pdiang nga da ka jingieit bad jingkitkhlieh nga la rai ban shimti beit ia i Riia haduh bakut…” La pynpaw u Bahnah
U Kpa ka Riia u phai sha ka men Kmie ban pan jingmut lang.
“Kmie phi la iohsngew ia kaei kaba ngi la iakren bad khamtam na u Bahnah ba u la pynpaw kunto, kumno phi sngew na ka liang jong phi pat..?” La buh jingkylli u Kpa ka Riia
I Kmie ka Riia i la rkhie bad ong
“Ngan ong shuh kumno nga sngew ba i Bahnah ruh i la sngewthuh lut ia kaei kaba jia. Kumto i la phla ruh hakhmat jong ngi, tang kawei kaba ngi donkam bad kata ka long ka jingkular lang jong ki markhmat, namar ha ka jingshisha lei ngi la dei ban kren shuwa iaka Riia ka khun lajong tangba ngi sngew kmen ba i Bahnah i la wan bapli kumne bad ngi la ioh pynban ban iakren beit markhmat bad i ia kane kaba jia, namar ngim kwah ia ka jingsniew hynrei ia ka jingbha..” La pynpaw ka Kmie ka Riia
“Ka dei kata ruh Kmie…” La mynjur u Kpa.
“Te ngi la shai kumto, ngim don eiei pyrshah ia phi Bahnah hynrei tang kawei kaba ngi don ban kyrpad bad kata ka long ba phin long rangbah bad u Kpa ba lah ba iai mo…” La ban ktien biang u Kpa ka Riia
“To Mama..” La mynjur u Bahnah
“Te, kumno long ngin iakren noh mynta bad ka Riia ruh…” La buh jingkylli u Kpa ha ka Kmie
“Mynta mynta, te ap shuwa phi bapli ka dang pang ka khun sa peit noh lashai la shisngi ynda ka la kham jem..” La ai jingmut ka Kmie
“To ih ngin sa leh kumta .. tangba Bahnah phin hab ban wan lang mo khnang ba ngin iashai lang…” La phai ktien u Kpa
“To Mama…” La mynjur u Bahnah.
U Bahnah u la sngew lehrain shibun eh namar kaei kaba jia. U la pynrit ria ia lade bad um sngew neh shuh ban shongkai, kumba ju long mynshuwa namar u sngewthuh ba u la bakla jur. Kumta hi u la pyrkhat ban leit noh artat ba la kham miet. U la ong
“Mama, Mei, to nga la kham miet ngan leit noh mo.. Ngan shu leit kren ia i Riia mo..” La pan jingmut u Bahnah
“O hooid, to sa wan mo, wan peit ia i Riia…” La ong u Kpa
“To..” La ong u Bahnah
Joit u ieng bad leit rung sha kamra ka Riia. Katba u dang ieng hangta u jaw ki ummat bad u ong ia ka
“Riia, ngan leit noh shuwa..”
“Balei phi iam…?” La kylli ka Riia
“Em.. Ngan sa wan pat..” La shu ong u Bahnah u mih noh syndon.
Ka Riia ka la dum buit bad ka la mut ban bat ia u; hynrei u la da iaid kham jngai, ka shu ong noh sa da wan mo.. Hadien ba mih u Bahnah ka ruh ka iam. [yn dang bteng]
Phi don ban ong eiei?