Mano, kino, shano bad haei kiba pang Covid-19?

Bah RM Shabong

Ki ju hikai ba haba thoh khubor, ka donkam ban wad jingtip, ba mano ba leh, mynno ka jia, haei ka jaka bad kumta ter ter; hynrei ha kane ka jingiakhun ia ka jingpang coronavirus, ngi iohi, ba kitei ki jingtip, ki la duh noh jynduh bad ka daw ka long ba ki don 12ngut kiba ioh pang covid, hynrei kaba ngi tip, ka long tang ia u ne ka, ha Pomlakrai bad kata ruh ka long, ba u leit kren video u Rangbah Shnong jong ka Mawtharia, kaba dei ka jaka, ba don u ne ka nongpang.

Lait nangta, ngim tip eiei shuh bad wat u ne ka nongpang, ba 12 ruh, ngim tip satia lada dei shynrang ne kynthei, ka rta, ka jaka sah bad kumta ter ter bad nangta sa kita ki 10ngut kiwei pat ruh, ngim tip, la katno ngut ki dei ki kynthei bad ki shynrang, ki rta jongki (khlem da iakren ia ki jaka sah, ki jaka trei kam jongki) bad ka daw ka long ba sorkar Jylla, ka buhrieh khop ia kitei ki jingtip.

Ha ki khyndiat taiew ba ladep, ngi iohi, ba U Himanta Biswa Sarma, myntri ka jylla Assam, u da jer kyrteng ia kito kiba ioh pang covid 19, u iathuh ba ki dei kiba wan na ka jingialum ki Muslim ha Delhi, u iathuh ia ki shnong jongki bad nangta, haba ka don kawei ka samla, kaba na Manipur ruh, ngi tip, ba ka dei kaba 22 snem ka rta bad nangta, haba ka jia ia uba na Mizoram, ruh ngi tip, ba u dei U Pastor bad kumta ter ter.

Katba ka jia, (imat ngi hap ban hun), namar ba ia ki khubor covid 19 ruh, ki kotkhubor na Shillong, ki ju hap ban kopi na ki online news bad ki telebishon channel na Assam bad lehse ia kitei ki jingtip, kiba bniah ia kitei ki nongpang ruh, lehse kin kham lah ban tih jylliew ki khubor Assam.

Ngim da tip bha ia ki ain thoh khubor, halor katei ka jingpang coronavirus, namar ba haduh mynta ka sorkar Jylla, lane ka tnat ka koit ka khiah, kam shym la batai satia ia ki kyndon ban thoh khubor, hynrei ngi iohi, ba ki don bun bah ki riew khmat, kiba ju iathuh hi ialade, ba ki leit shong jah thait marwei (isolation), ba ki don jing artatien ioh ki don ia katei ka jingpang bad sha ki ri sepngi lei, ngi iohi, ba kim lehrain ban iathuh, haba ki don ia katei ka jingpang.

Katba ka jia, hynrei ha kiba kum kine ki khep, kiba shah takrain, dei ki nongthoh khubor, kiba ju shah kylli “katno ngut, shynrang ne kynthei, dang don shuh bad kumta ter ter” hynrei hap ia hun ha ka ain buhrieh corona.