MANO BAN LONG MLA – KA DEI KA RAI JONG PHI

Apostle Reuben Roy Khongkrom
Senior Pastor
New Testament Restoration Church, India
Golflink – Polo Hills, Shillong – 1

Kum u para nong shongshnong jong ka jylla bad ka Ri bad kum U Pastor nga don ka jingsngewkitkhlieh haduh katta katta ban phah shaphi ia kane ka kyntien shuwa ba phin ñion ha u button ne shon ha ka shap jong ka jingjied ia u MLA jong phi bad ka jylla mynta ka 27th February 2023 ban long u nongthaw aiñ, said aiñ, u nongmih khmat jong phi na ka bynta san snem kumne harum:-

 Kumno phi pynshong nongrim ia u briew ban long u MLA? Namar ba phi don jingiadei, namar ba u iarap pisa, namar ba u iarap ia ki jingdonkam jong phi, namar ba u lah ban ai skim, em kam long kumta! Te iano pat ngin jied, Ka Bible ka ong, “Ruh putet men jied na uta u paidbah baroh ia ki briew ki banang basian, kiba sheptieng ia U Blei, ia ki briew kein kiba hok, kiba isih ia ka jinglalot; men thung ruh kum kine halor jong ki nongsynshar ia ki hajar, bad ki nongsynshar ia ki spah, bad ki nongsynshar ia ki sanphew bad ki nongsynshar ia ki phew. (Exsodos 18:21)

 Haba ia kiba hok la nang pynbun, ki briew ki shad kmen: (when the righteous are in authority, the people rejoice) hynrei haba u bymman u synshar, ki briew ki ud. (Proberb 29: 2)

 “Ha ka bymdon ka jingithuhpaw, ki briew ki kynther noh ia ka adong: hynrei uta uba sumar ia ka aiñ, suk uta keiñ” (Proberb 29:18). U nongjied u dei ban don ka jingshai mynsiem hapoh jong u ban jied ia u MLA jong u, ban sngewthuh bha ia ka jingieng ka party jong u, kat kum ka constitution jong ka Ri India. U briew u lah ne em ban thaw aiñ bad said aiñ, kaei ka jingpynpaw ba u don lada u long MLA?

 Wat rai ia ka vote jong phi da kaba ioh pisa ne shu die tad ia ka, da kaba ioh kyiad ei, ioh skim ei, ioh jingmyntoi tang shiphang por bad hadien pat phin long mrad hi ha uta uba phi la jied. Ka jingpynlong ia ka jingjied ba bakla ka long kum ka lynti ba imat beit ia u briew hynrei kaba kut kadei ka jingiap.

 Ia uno uno u briew uba phi la jied lada u long u ba bymman phin hap ia kit lang ia ka pop jong u. “Me wat buh kyrkieh ia la ki kti hano hano ruh em: lymne wat ia kit pop lem bad kiwei ki briew: to ri ia lade u ba sngur” (1 Tim 5: 22).

 Kum u nongjied phim dei ban shim ka bor halor lade khlem da kylli na U Trai ka met bad ka mynsiem jong phi iano ban jied namar donkam da ka jingiatiplem bakhuid ba phin jied ia u MLA jong phi mynta. Ia ki candidate ruh ki dei ban sngewthuh ba ka jingkyntiew bad pynhiar ka dei na U Blei kumta ka Bible ka ong, “Nga la ong ha kiba meng, wat da leh meng: bad ia ki bymman wat kyntiew ia la ka reng. Wat da kyntiew sha jrong ia la ka reng: wat kren bad ka ryndang ka ba eh. Namar ym dei na mih ngi, lymne na sepngi, lymne na shathie ruh ba wan ka jingkyntiew. Hynrei U Blei u long u nongbishar: u pynhiar ia uwei, bad u kyntiew ia uwei pat.” (Salm 75: 4-7)

 Ha ka Bible, ki syiem ba hok ki synshar bad ki syiem ba bymman ruh ki synshar. Hynrei ka jingmih na kine ka long haba kiba hok ki synshar ki briew ki kmen, ka ri ka man bha, ki briew ki ioh ka jinglaitluid, ki mane ia U Blei, ka jingsheptieng ia U Blei ka don bad kiwei pat ki jaid bynriew ki khynniuh bad sheptieng namar ba U Blei u don ryngkat bad kata ka ri. Hynrei haba u Syiem ba bymman u synshar ki briew ki ud, ka ri ka duk, ka pop ka jyllei, ki jingsniew ki kha roi, ki briew ki shong kum ki mraw, kiwei ki ri ki jop thma bad lute ia ki, bad wat ia ki spah ki phew jong kata ka ri la lute noh bad la pynjot ruh. Sa katno phi kwah ba ka jylla Meghalaya kan long? Kadei ka rai jong phi ban jied ia ki nongsynshar bad ki nongialam jong phi mynta.

 Sa katno phin pynkdor ia la ka lynti bad ka jingim ha kaba kum kane ka por? Uba iaid beit u iaid skhem hynrei uba kdor yn ithuh na ki lynti iaid jong u.

 Ban pynkut ka jinghikai na ka ktien U Blei ka ong, “Wat shah bayn shukor iaphi yn ym shukor ia U Blei; namar ia kaei kaei ruh ba u briew u bet, ia kata hi un ot ruh” (Gal 6:7).