Mano ban ioh ne duh na ka iatehlok ka UDP bad HSPDP?

Shillong, 12 Jylliew:

Ka jingiateh lok hapdeng ka UDP bad HSPDP ka dei ka mat ba ki pyrman saiñpyrthei ha kane ka jylla ki ia kren bha mynta la hato katei ka jingiateh lok kan pynioh nong ne pynduh nong ia kitei ki 2 seng.Kumba ka long mynta ka UDP ka don 8 ngut ki MLA bad ka HSPDP ka don 4 ngut. HA KHADC kumba ka long haduh mynta ki don 6 ngut ki MDC ka UDP bad ka HSPDP ka don 3 ngut, ki MDC ka UDP kiba la tikna ban ia khun ha u 2018 haduh mynta ki don 2 ngut u ba hDonkupar Sumer bad ka kong Rona Khymdeit (lait noh u bah Shylla uba la sngewthuh ba un sa phet seng noh), ki MDC ka HSPDP ruh ki ban ia khun ha u 2018 kiba la tikna ki don 2 ngut kong Teilinia Thangkhiew bad u bah Samlin Malngiang ( na Mawthadraishan katei ka seng ka dang bishar iano ban ai tiket watla u bah Blanding Warjri u dang shu jop ha ka elekshon shiteng samoi).

Ka la don ka jingkwah na ka seng HSPDP ban pynieng kyrtong haduh 17 ngut bad lada kan poi sha katei ka bynta ka mut ba ka UDP ka hap ia leh tang 20 tylli ki konstitwensi, lait noh ki konstitwensi ia lehkai paralok. Ki pyrman ka saiñ pyrthei ki la pynpaw ba lada ka jingiasam konstitwensi kan long ha katei ka dur 19 la 17 bad ka jingialehkai paralok kan wanrah ka jingduh nong ia ka UDP.

Shuh shuh ha ki konstitwensi ialehkai paralok kum ka Mawkynrew, ka Mawthadraishan bad ka Sohra ki MLA hangtei ki dei na ka seng UDP, katkum ka jingpyrkhat ki pyrman saiñpyrthei la ong ba katei kan dei lypa ka jingduhnong ia ka UDP kaba baroh 2 seng ki lah pynban ban liem.

Ka Mylliem konstitwensi bad ka North Shillong ki dei ki konstitwensi kiba ka HSPDP ka kwah bha, ha Mylliem katei ka seng ka don ia ka MDC jong ka ka kong Teilinia Thangkhiew hynrei la sngewthuh ba u kyrtong 2013 ka UDP ruh hangtei un ym shong satia bad hangtei ruh ki pyrman ki la ong ba ka lah ban mih ka jingialehkai paralok hynrei ka jingduh nong kan long pat ia ka HSPDP kaba la don lypa ka MDC.

Katkum ki symboh pyrkhat jong kitei ki pyrman ka saiñ pyrthei ki la ong ba ki 2 seng ki la dei ban ai beit ia ka Mylliem sha ka seng HSPDP katba ki 3 tylli ki jaka lehkai paralok dei ban ai beit sha ka UDP.