“Mano ba ong ba tang kiba nang English, kiba lah pule saian?”

Shillong, 15 Nohprah:
Tang mar ia sdang ban kren ha ka jingialang kaba la long mynta ka sngi ha Aurobindo Institute u V.Bhagaiah u All India Assistant General Secretary ka RSS u la ong “Ngi ia don hangne para nong India, ngi don ka ktien Khasi, Jaintia bad ngi don ruh ka ktien paidbah jong ka ri ka ktien Hindi, hynrei ngi hap pat ban ia kren da ka ktien kaba nabar Ri-ka ktien English” u la kren bad ka phuh samrkhie shuwa ban sdang ia ka jingkren jong u. U la bteng biang da kaba ong ba ka ri kum ka Amerika kam kren da ka ktien English hynrei ka kren da ka ktien lajong ka American English, “Kam dei ba nga pyrshah ia ka ktien English hynrei nga shu ong ba ngi dei ban nang ia ka ktien lajong” u la bynrap biang.
U Bhagaiah u la ong ba bun ha ri India ki pyrkhat ba lada ym nangkren English kim dei kiba stad lane kim lah ban leh eiei wat ban pule ha ki kyrdan kiba heh “Bun ki pyrkhat ba lada ngi kwah pule saian, ngi dei ban nangbha ha ka English, hato ka dei seh kata” u la ong. Shuh shuh u la bteng biang da kaba ong “To tip ba ki stad Saian lane ki saiantis kiba paw nam bha ha ka pyrthei ki dei na Germany bad na Isreal hynrei kitei kim nang English, ki thoh ki pule da ka ktien lajong hynrei ki dei ki stad saian ba pawnam ha ka pyrthei” ong u Bhagaiah.
Haba kren shaphang ka RSS u la ong ba kate ika de ka seng trei monsngewbha kum kiwei pat ki seng kiba trei na bynta ka jingmyntoi ki paid nongshong shnong ka ri India bad ka dei ka seng ka bym ju donkam jingiarap eiei ruh na ka sorkar. “Ka RSS kam donkam pisa na ka sorkar, kam don pisa nalade ruh hynrei dei ki paidbah kiba noh synniang, ka RSS dei tang ka nongpyntreikam lem ia katei ka pisa ki paidbah”. U la iathuh ba ki don 10,000 ngut ki khynnah kiba ka RSS ka phah pule kylleng ka ri India lyngba ka pisa ba ioh jingiarap na ki paidbah bad na kitei ki 10,000 ngut-3000 ngut ki dei na kane ka thaiñ shatei Lam mihngi ba kynthup ia ka Meghalaya, Mizoram, Arunachal Pradesh, Nagaland bad kiwei pat. “Dang katno mynta , uwei u samla na Nagaland uba ngi la sei u dang shu pyndep kum u saiantis uba tbit bha” u la ong.