Mano ba long trai ia ka jaka thang ha Jhalupara?

Bah Monarch Shabong

Ka long kaba sngewsih shi katdei ban iohi ba ka sorkar Jylla, kam lah ban pyndonkam ia la ka jong ka jaka thang briew, kaba don ha Jhalupara bad katei ka long, ba kam lah ban leit thang ia ka met jong u doktor, uba pawnam jong ka Jylla, uba la khlad na ka jingpang coronavirus.

Ka Jhalupara, ka don hapdeng jong ka nongbah Shillong bad ki briew kiba shong ba sah ha katei ka jaka, ki dei kiba la nang ba la stad bad ki tip bha ia ka jingpang coronavirus bad ia ka jingmut ba ngi dei ban kiar na ka jingpang, hynrei kam mut ban ong, ba ngi dei ban tieng ia katei ka jingpang, (namar ba kan lah ban wan ha kano kano ka iing lane ha uno uno u briew) bad ngi dei ban don ia ka mynsiem ialeh bad ba ngin jop; hynrei na kaei kaba ki nong shong shnong ka Jhalupara ki leh ka pyni ba ka jingtieng jongki, ka dang iai bteng wat haduh ia uba iap.

Ka jingleit on thang ia katei ka met, ka dei kaba ki doktor, ki la dep mynjur bad ki la dep sop bha ia ka met ka phad, hynrei wat la katta ruh kitei ki nongshong shnong kim hun satia bad katei ka pyni, ba ki la pynkhein ia ka jing pyniaid jong ki bor District bad ki la leh bym salia ia ka sorkar Jylla hi baroh kawei, ha kane ka saw ka sian bad kaba lyngngoh ka long ba ki bor District, kiba bom da ki lathi bad kiba pyn kynjih jakoid ia kito kiba ialeh pyrshah korphiw, hynrei kim shym la shlan satia ban pyn donkam ia la ka jong ka bor, ban khanglad ia ka jing ialum paidbah ha katei ka jaka (namar ba ka dei ka korphiw) bad nangta sa kawei pat ka long ba kim nud ban thang ia ka met iap jong u doktor.

Hangne, ngin nym iakren ia kiwei ki dorbar Shnong kiba sngew pyrshah ban ai jaka tep/jaka thang ia utei u doktor, namar kawei ka long ba kam shym don ka jing iakren lypa bad ar ba kam dei trai ka sorkar Jylla; hynrei kaba pyn pyrkhat jngai, ka long ia ka plan kaba nyngkong eh ha Jhalupara.
Donbok ba kan nym jia shuh ha ki sngi ki ban sa wan, hynrei lada ka long ha kane ka dur, ka pyni ba tang ia ka jaka tep/ jaka thang ruh ngim don satia, na ka bynta kitei kiba ioh ia katei ka jingpang coronavirus bad lada ka long kumta, ka paw shai ba ka sorkar Jylla, ka la tlot bor shaba palat bad khamtam eh, ba ka mynsiem Khristan kam don shuh pleng, ha ka tynrai jong ka jingim ki briew ha kine ki sngi.