Mano ba dei ki paid: “HYNNIEWTREP HYNNIEWKUM”

DA U SAMLA JEREMIIA DKHAR
PRESIDENT, HYC, MAWEIT CIRCLE.
Ki hynniewtrep lane hynniewskum ha ka ktien khasi ka mut ki hynniewtnum ïing ne ki hynniewtyndai ïing kaba mut ki paid Hynniewtrep ki mih sha ka pyrthei lyngba kawei ka longing na kawei ka kmie kawei ka kpoh bad uwei u sohpet bad ha kaba don hynniew ngut ki khun kynthei khlem pynrung kyrteng ia ki khun shynrang ha ka registar Kur ne kpoh namar ki khein jait na ka kmie.

Kine ki khun jong ka kong hynniew Trep ki dei Khynriem,Pnar,Bhoi,War,Maram Lyngngam bad Muliang. Ynda ki la ioh la ki jong ki briew ban ia poikha ki la wan ialam sha la ki jaka jaka ban rep lyngkha ha ki por mynshuwa,ki hymmen sawngut ki shong ki sah shathei Lam mihngi na ka ri-hynniewtrep bad ki para laingut pat ki leit noh arsut shaphang sepngi jong ka ri-hynniewtrep.

Ki khun ki ksiew jong kine ki hynniew ngut ki para kynthei ki la sdang ban iar ha la ki shnong ki thaw bad la sdang ban bun paid mynta haba ia nujor ia ka por ba mynshuwa pynban ka jingsngewdiaw ka long ba katba nang mih ki sngi ki ia bad nang iaid ki por ki sngi kine ki khun ksiew khun miaw kim ia ithuh shu shipara ne shidoh shisnam paka,ki la sdang ban ia bein ia khoh bad ia pait ia pra.

Ki la sdang ban khein kur wad kur pynban ia kiwei ki bym dei ki doh ki snam tynrai bad ki klet noh ia la ki hymmen para trai kiba mih na ka juh ka ïing, kajuh ka kpoh, kajuh ka trep, na ujuh u sohpet bad na ujuh u khiewja. Kim don shu ka jingiatylli bad kim kynmaw shu wad ia la ka kyrteng ïing ne kyrteng kmie “HYNNIEWTREP” Ki sah tang ha ka jingiabishni pihuiñ na kawei ka longing ia kawei ka longing, na kawei ka shnong ia kawei pat ka shnong, na kawei ka jaka shong ia kawei pat ka jaka shong kim nang shu ban ban ia ieid ia burom shipara.

Ha ka por mynhyndai kulong kumah ki paid hynniewtrep jong ka Ri jong ngi kim ju kham don ka jingbym ia sngewthuh jingmut kumba long ha kane ka juk stad ba mynta. Ia ka jaitbynriew hynniewtrep jong ngi la jer kyrteng ki paid ba “TIP BRIEW TIP BLEI,TIP KUR TIP KHA BAD TIP AKOR TIP BUROM” Namar ki tip ban ia ieid ia burom markylliang shipara pynban mynta la kylla khongpong tang ban ioh myntoi shimet ne namar ki la stad, ki la nud wad ban die lilam ia la ki kur, ki kha, ki hymmen para bad ia la ki para doh para snam banylla tang na ka bynta ban ioh pisa.

Haba ngi ong ne kynthoh ia lade hynniewtrep ne ki paidbah ka Bri u hynniewtrep ngi dei ban kynmaw ba ki don hynniew ngut shipara ne hynniew tylli ki trep bad ngi dei ban tip ia la ki jong ki shipara ban ia ioh bynta ha baroh artylli ki ki por kata ha ka por bakmen bad ha ka por bajynjar. Ngim dei ban ia bein ia bishni shipara lada duna ne bakla ka dei hok ban iamap markylliang ym ban kynnoh kat shaba lap bashem.

Ia ka kyrteng hynniew trep hynniew skum la pyniasyriem bad ki hynniew tylli ki kontinen jong ka pyrthei ha kaba ka jaitbynriew hynniewtrep jong ngi ruh ka don hynniew ngut shipara ne hynniew tylli ki ïing Trep ha kaba ki don hynniew tylli ki Sub-tribe bad kita ki long KHYNRIEM, PNAR, BHOI, WAR, MARAM, LYNGNGAM BAD MULIANG ki dei ki paid KHASI lane HYNNIEWTREP baiar.
Khatduh iawai nga kwah ban kyntu sha baroh ki paradoh parasnam kynthei bad Shynrang ban don ka “JINGIATYLLI bad JINGIATREILANG” Ym ban sngewpher niam,pher balang, pher shnong, pher jaka sah, pher dong, pher district,pher sur kren bad sngewpher kynhun ne sngewpher seng pynban ba ngin sngew kum shipara ba ia long kajuh ka kyndon kajuh ka jaitbynriew hynniewtrep hapdeng kine ki hynniew Sub-tribe nangne sha khmat. Kane kan wanrah ka jingtehsong kaba skhem ha ka imlang sahlang ka jaitbynriew hynniewtrep ka jong ngi.