Mang ka sorkar T. 100 klur ban iarap ia ki nongrep synsar bad kwai, ong u Conrad

Shillong:Ka sorkar ka la wanrah ia ka skhim Market Intervention Scheme ia u synsar bad u kwai ban iarap ia ki nongrep. Haba jubab halor ka jingiatai halor ka jingkren u Lat hapoh ka dorbar mynta ka sngi, u Myntri rangbah ka jylla u Conrad K Sangma, u la ong ba lyngba kane ka skhim, ka sorkar ka la mang T. 100 klur ban iarap ia ki nongrep haba ki iakynduh jingeh na ka jingtad ka dor.

U la ong ba kumba long mynta ka dor synsar ka dei T.35 shi kilo katba ka dor kaba buh ka TRIFED ka sorkar India ka dei T.50 shi kilo bad ka sorkar ka pynkiew sha ka T.55 shi kilo. Lyngba kane ka skhim, ka sorkar ka thied 800 kilo na uwei u nongrep bad la buh thong kumba 183 ngut ki nongrep namar ba ka skhim ka dang shu sdang mynta shi bnai eiei.

Kumjuh ia ki nongrep kwai ha kaba la buh dor T.110 u kwai shi kti ha kaba ka dor ha iew ka dei T. 70 eiei bad 400 kg u kwai yn thied na uwei u nongrep da ka sorkar bad kane ka dei ka sien ba nyngkong ban leh ka sorkar ha ka jylla haduh ba ka dor iew kan kiew khnang ban lait ki nongrep na ki jingeh na ka jingtad dor.
U Myntri Rangbah ula ong ba ka don ruh ka Committee halor kane ha kaba ki nongrep ruh kin long dkhot lang.
Ha kane ka skhim ka sorkar ka la mang ban ai jingiarap sha ki 2000 ngut eiei ki nongrep kiba kham duna ha ka ioh ka kot mynta u snem.