Mang ka sorkar pdeng haduh T.2.70 klur, ban shna ia ka surok na Nongstoiñ sha Wahkaji

Shillong: Ka Sorkar Pdeng ka la phah haduh 2.70 klur tyngka sha ka Sorkar Meghalaya ba kan shna ia ka surok kaba pyniasnoh naduh ka shnong Nongstoin shaduh ka shnong Wahkaji kaba long ka shnong kaba ia don markhap bad ka par uranium kaba hap ha South West Khasi Hills District.

Ha ka jingkren ba la kren ha ki lad pathai khubor, u Bah Prestone Tynsong u ba dei u Symbud Myntri Rangbah jong ka Sorkar Jylla u la ong ba ia kane ka jingtei ia kane ka surok la mang pisa ban pyntrei da ka scheme SARDPNE bad shen ka tnad PWD kan sa khot ia ka tender.

Shuh shuh, u Bah Prestone u la ong lyngba ka Phase 1 yn pyntrei shwa ia ka surok kaba pyniasnoh na Nongstoiñ sha Wahkaji bad yn pynsangeh noh ia ka jingshna kaba pyniasnoh ia kane ka shnong shaduh Mawthabah. Ia ka Phase 2 pat yn sa sdang biang ban shna ia ka surok kaba pyniasnoh naduh ka shnong Wahkaji shaduh ka shnkng Phlangdiloiñ da kaba pyniasnoh ia ka shnong Ranikor.