Mang ka dorbar NEC T. 1088.21 klur 2 snem ban pynroi Dong Mihngi

Shillong, 4 K’lyngkot:
Ka dorbar jong ka North Eastern Council (NEC) ka la pdiang ia ka mang tyngka kaba T. 1,088.21 klur na ka bynta u snem 2015-16 ban pynlah ia ka Council ban pyntrei ia ki kam.
U myntri ka tnad DoNER uba dei u chairman ka NEC u Dr Jitendra Singh u la pdiang ia ka jingmang pisa kaba 63rd jong ka Council kaba long ha kane ha ka sngi Thohdieng.
Kine ki jingtyrwa kim pat long kiba kut hynrei kin pynlah ia ka NEC ban leh ia ki kam ha kine ki snem haduh ba kawei ka dorbar kan sa shong biang ban shim ia ka mang pisa kaba biang, la ong ka kyrwoh sorkar na ka NEC.
Ka bynta jong ka leit ka wan, ki kam rep kam riang bad kiba iadei bad ka bording ki ioh bhah kham bun ha kane ka mang pisa haduh 71.26 per cent.
Ka NEC ka la aiti ia ka jingmang pisa kaba T.1088.21 klur na ka bynta u snem 2015-16 katkum ki jingdonkam jong ki tnad.
U myntri ka tnad DoNER u la ong ba ki jylla kane ka thain ki dei ban pyntreikam ia ka pisa. U la ong ba ha kane ka snem ba la dep, kumba 70 percent ka mang pisa khlem lah ban pyndonkam da ka NEC.
U la ong ba ka jingpyniaid ia ki liengsuin ha kane ka thain, yn pynbha. U la ong ba la lah ban pynher biang ia ki liengsuin ka Alliance Air sha Umroi, Lilabari, Silchar bad sha Tezpur Airport.
U myntri ka tnad Road Transport Highways (MoRTH) ka la buh ia ka National Highway Infrastructure Development Corp. Ltd (NHIDCL) na ka bynta ka NE ha kaba ka jaka treikam ka don ha Guwahati.
U la ong ba ka la don ka jingthmu ban pynsted ban shna surok bad ban pynbha ha kane ka thain ha kaba la mang T.200 klur da ka DoNERha kane ka mang pisa ba mynta ban pyntreikam ia ka NE Road Sector Development Scheme (NERSDS).
Ha dorbar ka NEC la wan iashim bynta u Lat ka Arunachal Pradesh u Lt Gen. Nirbhay Sharma (retd.) bad u Myntri Rangbah Nabam Tuki, u Lat ka Nagaland u P.B. Acharya bad u Myntri Rangbah u T.R. Zeliang, u Lat ka Meghalaya u K.K. Paul bad u Myntri Rangbah Mukul Sangma, u Lat ka Sikkim u Shriniwas Patil bad u Myntri Rangbah u Pawan Chamling, u Myntri Rangbah ka Mizoram u Lal Thanhawla bad u Myntri Rangbah ka Manipur u Okram Ibobi Singh.
U Myntri Rangbah ka Assam u Tarun Gogoi bad u Myntri rangbah ka Tripura u Manik Sarkar kim shym la lah ban poi.