Mana u Symbud Myntri Rangbah, ia ki kali kamai ba kim dei ban oh dor heh ia ka dor bai kali

Shillong: Hynnin ka sngi, u Symbud Myntri Rangbah jong ka Jylla, u Bah Prestone Tynsong u la pyntip ba ka Transport Department, ka peit bad khmih ba ki kali kamai baroh kim dei satia ban khñiot beiñ ka bai kali jong ki paidbah ki ba shong kali da kaba kin khmih bha ruh ia ka jinglong jingman jong ka rukom long naduh kaba napoh. U la bynrap shuh shuh da kaba u la ong ba ki kynhun nongniah kali kamai kim dei satia ban shim kabu ia kane ka jinglong jingman da kaba u la ong ba ia ka jingiakhih ka jong ki kaba la jia ha u bnai Rymphang halor ka jingkiewdor jong ka petrol bad ka diesel bad ha kaba ki la dawa ruh na ka Sorkar ba ka dei ban map ia ki kot khajna jong ki, ka Sorkar ka la dep ban peit bad mynjur ia kine ki jingdawa ki jong ki baroh.

Haba kren sha ki katto katne ki lad pathai khubor, u Bah Prestone Tynsong u la ong,”Nga kwah ban kyrpad bad mana ia baroh ki kynhun taksi kamai ba kin sngewbha ba kin nym dei ban shim kabu tang namar ka jinglong jingman jong ka pyrthei. Hooid ngi donkam ban pynmih pisa hynrei ha kajuh ka por ruh phi donkam ban sngewthuh lang ia ka jingeh jong ki nongshong shnong jong ka jylla Meghalaya ba ki hap ban iakynduh mynta. Kumta ngin pyntikna ba kum kine ki jingshim kabu da kino kino ki briew ne da kino kino ki kynhun kin nym don satia”.