Mana bret niut

Shillong, 2 Naiwieng:
Ka Dorbar Dong Tympang Iawmusiang Jowai, hadien ba ka la dep pynbna da ka jingmana ba ym bit shuh ban bret pathar ia ki niut ki nier hapoh ka dong ne sharud surok kaba dei ka Iew bah jong ka Jaintia hynrei ym don ba patiaw ei ei, kumta sa shisien biang kala pynbna paidbah sha ki Nongshongiew, Nong shong dukan bad ki nong shong shnong baroh kiba hapoh ka Dong Tympang Iawmusiang ba naduh ka ba mih kane ka khubor ba kim dei shuh ban bret ia ki nuit ki nier jong ki kat shaba lap, hynrei ki dei ban da lum ia ki ha ki syndup lane byrni bad ban bret mynla ka step ha ki Trok Municipal.
Ka la mana ruh ba ym shah shuh ban lum thup shi jaka ia ki niut ha ki bynta jong ka Lad Thomas Jones, Lad K.N.B (mar pyrshah stand Taxi) bad ha khmat DC Office Jong ka SeinRaij Complex, kumjuh ruh iaki nongdie Doh ba ym bit shuh ban die ha ki lynti iaid kjat ynda haba la kem miet. Lada ka Dong ka lap ia kino kino kiba ialeh pyrshah ha ka sien nyngkong kan dain kuna T.500 tyngka bad na kane ruh kan kiew arshah laishah lada dang lap shuh shuh ia kiba iaid laid na ki mana. Ki Rangbah Dong, ki Volunteer kin sdang ban pyntreikam iakine ki jingmana naduh ka mynta u bnai, bad ha kano kano ka por ki lah ban kem ia kiba ialeh pyrshah bad ban dain kuna kumba la kdew haneng.