Shillong:Ka pynbna ka sorkar pdeng ba kan pyntreikam ia ka bhah 33 percent ia ki kynthei ha Lok Sabha bad ha Assembly, ka la pyndukha mynsiem ia kiba bun ki MLA, ioh ba, ka konstitwensi jongki, kan leit sha ki kynthei.
Katkum ka rai ka sorkar pdeng, ka bhah ia ki kynthei ban iakhun MP bad MLA kan treikam naduh 2029.
Haba pyrshang ban twad jingtip na u Chief Electoral Officer (CEO), u BDR Tiwari, ula iathuh ba haduh mynta, ym pat ioh jingtip jingthoh eiei na ka Election Commission na Delhi, halor kane ka bynta.
“Ym pat ioh jingpyntip eiei haduh mynta na ka Election Commission na Delhi haduh mynta”, la ong u Tiwari.
U la ong ba tang kawei kaba ula ioh jingtip, ka long ba kane ka bhah nongmihkhmat ia ki kynthei kan kylla man ka 15 snem na kawei ka konstitwensi sha kawei pat.
Hynrei kumno bad ha kano ka rukom yn sdang ban bhah ia ki konstitwensi ia ki kynthei ruh, kam pat don satia kano kano ka phormula ne ka rukom khein.
“Kumno ne na kano ka konstitwensi kan sdang, ym pat ioh kano kano ka jingbatai halor kane”, ula bynrap.
Katkum ka bhah kyrpang ia ki kynthei, ka jylla Meghalaya kaba don 60 ngut ki MLA kan long jin haduh 19 tylli eiei ki konstitwensi, kin leit tang sha ki kynthei.
Ha kajuh ka por, u Tiwari ula ong ba kam pat don kano kano ka jingbthah na ka sorkar pdeng ne ka Election Commission halor ka jingpynbeit thymmai ia ki konstitwensi.
Phi don ban ong eiei?