Maham u EM ia ki Rangbah Shnong

Nongpoh, 30 ‘lyngkot:
“Kino kino ki Dorbar shnong kim lah ban ai jongbit ne NOC sha kino kino ki briew kiba kwah ban buh ia kino kino ki Karkhana khlem da ioh jingbit na ka KHADC” ong u Bah Hadrian Lyngdoh, u EM ka KHADC ba dei peit ia Market, Land, Mines & Minerals, ha ka sngi ba ki briew jong ka KHADC ki la pynlong ia ka jingleit ban jurip ia ki jaka tyllait maw ha ki thain Killing, Ri Bhoi District.
Kine ki kyntien ki la mih na utei u EM ka KHADC, ka dei hadien ba u la lap ba bun na ki jaka tylliat maw kiba don ha ka thain Killing, kim shem la ioh satia ka jingbit na ka District Council, hynrei ki shu pyndonkam da ka NOC kaba la ai da ki rangbah shnong jong ki shnong ba don kitei ki jaka tylliat maw, hynrei ki la iaid lait noh na ka KHADC bad kaba la wanrah ruh ia ka jingduhnong kaba khraw ia ka tnat Revenue jong ka KHADC.
Kum ban shu ong hangne, ha kane ka jingleit jurip da utei u EM ka KHADC ia ki 12 tylli ki jaka tylliat maw ha ki thain Killing, la lap ba dei tang ka jong u Bah Khrik Lyngkhoi kaba la ioh jingbit na ka KHADC, hynrei lait nangta baroh ki dei kiba la shu buh beain khlem ka jingtip da ka KHADC bad kaba kham pynglyngoh eh ka dei ba bun na kitei ki jaka tylliat maw la long trai da ki bar jylla.