Maham u DC ia ki trok ba bret pathar ia u Fly-ash

Jowai, 7 Iaiong:
U Deputy Commissioner ka West Jaintia Hills, mynta ka sngi u la pynmih ia ka hukum hapoh ka kyndon 144 CrPC ban khang bad ban mana pyrshah iaki driver trok ban bret pathar ia ka dpei Fly-ash kiba la kit naka bynta ban pynpoi sha ki kharkhana dewbilat sha East Jaintia Hills.
Ki trok kiba la kit ia utei u mar ban pyndon kam ha ki kharkhana dewbilat la lap ba na ka por sha ka por ki la bret pathar ha shi lynter u surok bah shwa ban poi ka jaka thew Hynniewmer Weighbridge.
Kane ka jingleh jong ki driver trok ka la pynjakhlia ia ka mariang khamtam ia ki um ki wah.
Katkum katei ka hukum, u DC u la ong ba katei ka hukum kan treikam mar mar bad kan neh haduh 2 bnai lane lah ban bteng ia ka na ka bynta ban iada ia ka mariang bad ia ka koit ka khiah jong ki paidbah.
Kino kino kiba leh pyrshah ia katei ka hukum, na ka liang u DC u la ong ba ki nongialeh pyrshah kin ngat ha ka jingpynshitom kaba katkum ka ain bad u la kyntu ruh ia ki paidbah ban ujor mar mar lada lap ia kum kitei ki jingpynkhein ia kane ka hukum da kaba SMS lane ujor lyngba Whatapps No. 9436394363 lane lah ruh ban ujor lyngba ka face book page “District Administration, West Jaintia Hills”.