Nongpoh, 28 K’lyngkot: U District Magistrate ka Ri Bhoi District, lyngba ka bor kaba la pynkup ia u, kata lyngba ka kyndon ain ba 163 jong ka Bharatiya Nagarik Suraksha Sanhita, 2023, mynta ka sngi u la pynmih ia ka hukum ban maham pyrshah ia ki trai jaka, kiba pynthut ha ka jingpyntrei ba dang iaid shaid shaih ia ka surok Shillong Western By-pass.
Katei ka hukum jong u District Magistrate ka Ri Bhoi, ka dei hadien ba ki la ioh ia ka kaiphod na ka NHIDCL- PMU Mylliem East Khasi Hills, kaba la kynnoh ba la don ki katto katne ki trai jaka, kiba la pynthut bad khlem ailad ia ka jingpyntrei ia ka surok Shillong Western By-pass, kaba hap ha shnong Nongkyndong, Ri Bhoi District.
Katkum ka kyrwoh kaba la phah da u District Magistare ka Ri Bhoi, la ong ba kito ki briew kiba don jaka ha ki bynta ba dei iaid ka surok Shillong Western By-pass, la dep ban siew ia ka bai jaka jong ki bad kumta katei ka jaka, ia kaba ka sorkar ka la dep ban siew ia ka bai jaka, ki trai jaka kim doh hok shuh ban tuklar ne pynwit ha ka jingpyntrei ia katei ka surok Shillong Western By-pass, namar ba katei ka jaka ba la dep ban siew sha ki trai jaka, ka la dei ka jaka jong ka sorkar bad kaba ym don mano mano, kiba lah ban tuklar ne ban pynthut ia ka jingpyntrei jong ki kam pynroi bad khamtam ia ka jingpyntrei ba shaid shaid jong katei ka surok.
Namarkata, hadien kane ka jingpynmih hukum bad lada lap ba don kino kino ki briew ne ki trai khyndew, kiba pynthut ha ka jingpyntrei ia katei ka surok Shillong Western By-pass, kin sa ngat ha ka jingshah pynshitom katkum ka kyndon ain 223 jong ka Bharatiya Nyaya Sanhita 2023 bad kane ka hukum ban treikam mar ia mih kane ka jingpynbna.
Phi don ban ong eiei?