Maham ki VDP Iongkaluh

Jowai,25 Risaw:
Ki dkhot ka Village Defence Party (VDP) jong ka shnong Iongkaluh East Jaintia Hills District, ha ka kyrwoh ba la pyllait da u ma Verify Dkhar Secretary bad u Midaling Dkhar President ka VDP, ki la pynbna ba la maham ia kino kino ki briew kiba wan rah ka jinghuri hura iashoh iadat dih buaid hapoh shnong pohthaw. Na ka liang ka VDP ka shnong Iongkaluh hadien ba ka la mad bad ia kynduh shi bun ki jingeh na ka por sha ka por tang na ka daw ka jingiadih kyiad buaid bad ka jingioh lad ban die kyiad pathar kane ka wan rah shibuh ki jingkulmar hapoh ka shnong ka thaw, kumta u la ong ba ki bor ka VDP kin nym shah shuh iano iano ban pynieng kali, iashong lang ha surok ne ha ki kyndong kynshrot ka shong khlem kano kano ka kam palat ia ka por 8 baje janmiet shaneng. Ka VDP ka la ong ruh ba lada don kino kino kiba leh pynrshah ia kane ka shnong kan nym map bad kan pynshitom kat kum ka ain, kane ka jingmaham kan trei kam naduh ba la mih kane ka khubor.