Shillong:Kum shi bynta ban wan rah ia ka khuid ka suba ryngkat ka koit ka khiah ha poh ka shnong ka th aw, ha kaba ka dorbar shong Nong mynsong ryngkat ka jing snoh kti lang jong ki nong niah kali ka mai kiba don ha ka kynhun ka Nongmyn song Taxi Drivers Association, ha ka sngi Balang ka 13 tarik u Naitung 2022, ka la pynlong ka jing sar pynkhuid ia ki jaboh jabain hapoh jong ka iew Nongmynsong bad ha ki surok ki lynti ki syngkien bad ka dong Nongmynsong hi baroh kawei.
Ha kane ka jing pynlong ka jing ia sar pynkhuid kaba la pyniaid da ka tei ka kynhun nongniah kali, la shim bynta da u Rangbah Shong ka Nongmynsong u Bah P Warjri ryngkat ki nongkit kam shnong kiba la shim bad bat ia u synsar kum ka dak ban pyni ka jing leh khuid leh suba hapoh ka shnong ka thaw.
U Bah Warjri Rangbah Shong haba kren ia phang ka khuid ka suba ba ym tang ban leh khuid hapoh ka iing ka sem ne ia lade shimet hynrei ia baroh ki sawdong sawkun, ula kyrpad ia ki paitbah ba ki dei ban snoh kti lang ha kaba ia dei ban ka jingleh khuid kan wanrah ia ka jingjop hopoh ka shong bad ha la kajong ka Ri namar jingleh nang ban tyngkai ban leh khuid ka dei ka spah bah ha ka jingim briew.
Ula kyntu ruh ia ki nong wan thied wan pet haba ki wan hapoh ka iew ka hat ki dei ban long adkar bad burom ia ki dosbin [used me] kiba la bun khnang da ka dorbar shnong ula pynsngew ruh sha ki nongshong iew nongshong dukan ban long kiba ia trei ryngkat katkum ki jingbthah jong ka shnong. Ka shnong ruh ka ju bun ia kita Volunteer kiba long ki nong sar ia ka iew man ka step, hynrei, ula ong ba u kthang ka mynsiem haba u iohi ba don ruh ki katto katne ki bym shem khein snep ia ka khuid ka suba.
Ula ong ruh don ki paitbah kiba shim kabu da kaba ki bret ia ki jaboh jabain na iing bad wan bret ia ki ksew ki syiar ba iap ha lynti ha surok kaba wanrah ka jing sam iewtung ula maham tyngeh ba kino kino kiba leh pyrshah ka shnong kan leh kat kum ki kyndon jong ka shnong. Shen ula ong ba ka shong Nongmynsong kan sa leit ia kynduh ia ka Deputy Commissioner East Khasi Hills District ban pan jingbit kum ka shnong ban buh noh da ki kyndon ain ha ka jingshah dainkuna ia baroh ki dukan ne ki paitbah khnang ba lada buh ki kyndon ba la ioh na DC kan long ka jingtieng burom noh jong ki paitbah ia ki bor jong ka ain.
Ha kajuh ka por na ka liang u president katei ka Nongmynsong Drivers Taxi Association, u Bah Kmenlang Khonglah uba la shim ka jing snoh kti lang bad ka bor shong da kaba la ia wer ia ki para nongniah kali kumba 200 ngut kiba don bynta ban pynkhuid ia ki sawdong sawkun, ula maham ruh khamtam ia ki nongleit nongwan na ki thain Neigrihms kiba dei ki nongwei haba ki iaid lynti na ki thain Nongmynsong ba kim dei ban kawang jaboh jabain napoh ki kali bad kham tam ia ki bilor jingdih pynbuaid, namar kane kan wanrah ka jingsniew bad jingmynsaw ia ki nongleit nongwan.
Ula pynsngew ruh ba kum ki Driver, kiba im man ka sngi ha rurok da kaba kamai jakpoh ba ka surok ka dei ka iing ka sem jong ki Driver Taxi, namar kim ju da don bha ha iing ha sem, hynrei tang ha ka por ba ki wan ban thiah bad la ki khun ka lok.
Phi don ban ong eiei?