Maham ka Wapungskur

Jowai, 15 Jylliew:
Ka Dorbar Shnong Wapungskur da ka jing bitar ka ba jur, ka la maham jur ia ki riew runar ki ba shait leh ia ki kam pyntriem da kaba pyniap briew bad wan bret ia ka met iap shapoh u pud u sam jong ka Shnong Wapungskur.
Ka Dorbar Shnong Wapungskur, ka pynpaw ia ka jingbitar kaba kaba haduh  katta katta halor ka jingpynlong jong ki riew runar riew pyntriem ia ka shnong Wapungskur kum ka jaka bret met iap (Mortuary House). “La jan man la ki por  ba ki runar ki leh iaki kam pyntriem ha East Jaintia Hills da ka ba pyniap briew ki shait wan bret beit ia ki met iap shapoh u pud u sam jong ka shong bad kane ka long ka bym lah ban pdiang satia da lei lei ruh em da ka shnong bad lada lap ia ki ba kum kita, ka Dorbar Shnong ka la rai ban leh da ka ba tyngeh hi dain haduh ba kin da kyndit bynriew syndon” ong u Bah Satly Ryngkhlem, Waheh Shnong jong ka shnong Wapungskur.
“Kane ka jingpynlong  jong ki runar  ia u pud u sam jong ka shnong kum ka jaka bret met iap, ka la wanrah ia ka jingjah burom bad ka jingsngew ngiew kaba khraw ia ka shnong hi baroh kawei, ka shnong ka bym ju ai lad satia ia ki kam sniew kam pyntriem bad kino kino ki jait kam ki ba ka imlang ka sahlang kam pdiang satia ba kin ioh ban suh thied hapoh u pud u sam jong ka shnong” ong shuh shuh u Bah Ryngkhlem.   Ka Dorbar Shnong ha ka juh ka por ka maham jur ruh ia kino kino ki briew ki ba leh ia ki kam sniew bad kam pyntriem hapoh u pud u snam jong ka shong ba la da ka shnong ka lap kan leh da kaba tyngeh pyrshah ia ki ba kum kita ki jait briew.
“Ka Dorbar Shnong ka kyntu ruh ia ki bor jong ka ain ba kin trei shitom kaba kot la ka bor ha ka ban peit ngor bad tem naphang ia ki kam pyntriem ha East Jaiñtia Hills na ka bynta ban pynneh pynsah ia ka shong suk shong sain ha ki man shnong man thaw bad ka imlang ka sahlang. Ka Dorbar Shnong ka kloi ban ia snoh kti bad ki bor jong ka ain lad aka long ha kano kano ka rukom ruh na ka bynta ban ialeh ban pynduh jait noh  ia ki kam pyntriem bad kiwei pat ki kam sniew ha ka imlang ka sahlang”  la pynkut u Bah Ryngkhlem.