Maham ka sorkar India, ban pyndonkam ia ki N-95 mask

Ka sorkar India, ka la thoh sha baroh ki jylla, ha kaba la maham ia ka jing pyndonkam ia ki mask, kiba la tip kum ki N-95, kiba don bad ki valved respirator lane ki thliew kiba ring bad pynhiar mynsiem bad la ong ba kine kim iada satia na ka khlam coronavirus bad ki long pynban ruh ki jingdeng kiba ailad bha ba kan rung katei ka jingpang ha ka met jong u briew.

U Director General of Health Services, ha ka tnat ka koit ka khiah, ula thoh shithi sha ki Jylla, ha kaba ula kynthoh halor ka jing pyndonkam ia ki N 95 mask, khamtam kito kiba don bad ki thliew kiba ring bad pynhiar mynsiem.

Ka tnat ka koit ka khiah ka sorkar India, ka la pynmih ia ka jingbthah ha u bnai Iaiong, ha kaba la ai jingmut ban pyndonkam, da ki jingdeng kiba shna hi, ban tap ia ka shyntur bad ka khmut. La bthah ruh ba lada dei ha kajuh ka iing ruh, dei ban pyndonkam, la ki jong ki jingtap shyntur bad ym dei ban pyndonkam lang da kajuh ka jingtap shyntur.