Maham ka Pyllun, ki longkmie bad ka HITO, ban shongkai por miet ha Fly Over Umiam

Nongpoh:Hadien ka jingshah shoh bad ka jingkhlad noh jong uwei u samla naka shnong Umeit ha jingkieng Umiam (Fly Over) kaba la pynpar niangkhriat ruh ia kiba bun ba lang, ka seng HITO Ri-Bhoi District lem bad ka Seng Longkmie jong ka Shnong Pyllun bad ki bor pulit mynhynnin ka sngi, ki la leit ban pynkhuid ia ki jaboh kiba la sarah ha katei ka jingkieng bad buh syndon ka jing maham ia ki paidbah ba kim dei ban shongkai ha katei ka jaka naduh ka por 6 baje mynmiet.

Katei ka jingmaham kala mih ruh hadien ba u samla Ajay Kharhujon naka shnong Umeit na Ri Bhoi, khlem da tip ia ka daw bad ithuh ia ki briew u la shah shoh pynmynsaw haduh ba un da khlad noh syndon na kane ka sla pyrthei, ha katei ka jaka kaba ki briew ki ju sngewtynnad ban iengkai ban shondur bad don ruh kiba ieng ban ia muja ban dih kyiad.

Naka liang ka seng HITO, ha ka jingdon lang ki bor pulit bad ki bor shnong ki la pynkhuid ruh ia katei ka jaka bala satah tang da ki jaboh jabain bad ki plastik bad kumjuh ruh ki bolor kyiad bad maham tyngeh ruh ba ki paidbah kim dei ruh ban pynlong kum ka jaka dih kyiad ia katei ka jaka naduh ka por 6 baje janmiet shaneng, bad lada lap na ka liang ka seng, ki bor shnong bad kumjuh ruh ki bor pulit kin sa shim da ki lad ki lynti ba tyngeh ia kiba leh pyrshah ha katei ka jaka khnang ban teh lakam ia kino kino ki kam sniew ha katei ka jaka.