Maham ka Mawkhar ia kiba shim kabu

Shillong,25 Risaw:
Ka Executive Committee jong ka Dorbar shnong Mawkhar, ka la pynrem jur ia ka jingjia kaba la jia ha ka 23 tarik mynta u bnai halor ka jingshah kawang Petrol Bomb ka synduk Alumuri u bar jylla hajan ka ophis ka kur Nongrum. Ka dorbar shnong ka la kyntu ia ki bor ka ain ban kem mardor ia kum kitei ki briew bad ban pynshitom tyngeh.
Ka Dorbar Shnong ,Mawkhar ka la maham ba kan ym shah da lei-lei ia ki riew bymman , ki riew runar bad ki nongshim kabu ban leh ia kino kino ki kam pyntriem hapoh u pud u sam ka dorbar Shnong, ka la kyntu ruh ia ki nongshong shnong ba kin long kiba peitngor , husiar bad kiba phikir ban ym ailad ia kum kitei ki briew ban leh ia kino kino ki kam pyntriem hapoh ka shnong ka thaw.