Nongpoh: Ka Khasi Students’ Union North Khasi Hills District Unit, lyngba ka kyrwoh kaba la phah da u samla Receive Pator, uba long kum u Environmental and Cultural Secretary, u la kyrpad ia ki paidbah hapoh ka Distrik Ri Bhoi, ba ki dei ban kiar na kaba thang khlaw pathar, namar ka kam thang khlaw, ym tang ba kan pynjot ia ka Mariang, hynrei bunsien ka ju wanrah ruh ia ki jingjia ba sngewsih, namar ki don ki longing kiba la mad ia ka jingduhnoh ia ki iing ki sem bad ki jingthung jingtep, tang namar ba pur ka ding kaba la thang dusmon da ki briew ha ki khlaw ki btap.
Lyngba katei ka kyrwoh kaba la shah ki lad pathai khubor, utei u nongialam ka KSU, u la pynpaw ba ha kaba kum kine ki bnai, la sdang ban jur bha ki kam thang khlaw, ia kaba la leh tang da ki katto katne ngut ki riew shim kabu, hynrei ka wanrah pat ia ka jingjulor ia ki khlaw ki btap bad khamtam eh ia kito ki briew kiba don ia ki jingthung jingtep ha ki khlaw ki btap.
Shuh shuh, la pynpaw ruh ba ka ka seng ka lap ruh na ka por sha ka por ba don ki katto katne ki riew shim kabu kiba ju mlien ban thang ia ki khlaw ki btap bun ki iing ki sem bad jaka rep kiba don marjan ki shem shitom bad ki hap ban pynlip ia ka ding kaba pur ban iada na kino kino ki jingduhnong bad ki jingjia ba sngewsih. Namarkata, lyngba ka kyrwoh, ka KSU ka maham tyngeh ia kino kino ki riew shimkabu bad ju mlien ban wiang ding ia ki khlaw ki btap, ba ki dei ban sangeh noh shisyndon bad ha kajuh ruh ka por, ka kyrpad ia ki Paidbah ha Ri Bhoi, ba kin iatreilang bad ka seng, na ka bynta ka jingmyntoi u paidbah ba bun balang.
Phi don ban ong eiei?