Maham ka KSU, ban pyntrei kam ia ki ain lajong, hadien ba la mynjur ia ka CAB

Shillong: Ha ka jing ialang mynta ka sngi, ka KSU ka la ia rai ban pyntrei kam beit da ki ain ka seng ban tehlakam ia ki mynder ba wan rung sha ka jylla meghalaya.

U President ka seng KSU u bah Lambokstar Marngar, u la ong ba ka seng ka lah rai ban pyntreikam ia ki ain jongka, namar ka jing khein sting ka sorkar Meghalaya ban pyntreikam ia ki khyrdop teh lakam ia ka jing wan rung ki mynder ha kylleng sawdong ka Meghalaya.

U bah Lambokstar Marngar, u la ong ba ka seng ka don palat 700 tylli ki unit ha ka jylla bad ka seng kam tieng ban ia tyngkhuh bor bad ka sorkar kmie lada ka CAB ka long ain.

Ka seng ka la kyntu ia ka sorkar Meghalaya ba kam dei ban shu kren tang da shyntur ba ka pyrshah CAB hynrei ka dei ban leh da ki kam ban pyni ia ka jing pyrshah.