Maham ka FKJGP ia ki bus saw

Shillong, 29 Nailar:
Ka FKJGP ka la maham ba ki ki nongniah bus saw (Shillong Public Transport Service bad Shillong Special Transport Service) kim dei ban iaid kyrkieh katba ki nongshong kim pat lap ba kiew hapoh bus bad bym dei ban iaknieh ban iaid shakhmat khamtam ha jaka ba long iew bad khapngiah namar ba ka buh jingma ia ki.
Ha ka jingpynlait kywroh, u Vice President ka seng u Bah Palwanbor Syiem u la ong ba ka Seng ka kyrpad ia u paidbah lada lap ia ki nongniah baleh khlem akor kin pyntip sha ki nongialam jong ka seng bad shim number kali bad ka por ba jia khnang ba ka seng kan leh ia kaba donkam.
U la ong ba ka seng ka la ioh shibun ka jingujor na ki paidbah ba shong ia ki bus Saw Sorkar ia ka jinglong khlemakor jong ki nongniah bus bad ki nongbud khamtam hapoh Sor Shillong ba ki paidbah ki ud ba bun bun sien ki nongshong bus kim lap ba kiew khamtam ia ki khynnah skul kila iaid la ka iaid ban iabeh ban thep nongshong ban kamai bun bad don ruh wat kiba mynsaw tang ba kyrkieh ban iaid khlem akor kine ki nongniah bus saw, kiba iaknieh ban iaid shakhmat para bus saw ban thep nongshong kaba long ka jingma ia u paidbah ba iaid lynti tang ka jingiaknieh kamai jong ki.
Ban lait na kano kano ka jingma ia u paidbah ba leit ba wan, ka FKJGP Sengkmie ka maham jur ia ki ba kim dei ban leh kumne bad lada don ki nongshong kali ba iakynduh ne lap ia kum kane, ki dei ban pyntip sha ka seng ba kan leh ia kaba donkam, u la bynrap.